هاونیشتمانییانی خۆشەویست، خەڵکی بەهەڵوێستی کوردستان!
جارێکی دیکە و لە نەورۆزی ئەوساڵدا شکۆمەندیی بەڕێوەچوونی ڕێوڕەسمە نەورۆزییەکان لەلایەن ئێوەی خۆشەویست و بەشداریی گەرموگوڕتان لەو ڕێوڕەسمانە، مانایەکی دیکەی بە نەورۆزی ئەوساڵ بەخشی. بۆیە جێی خۆیەتی پڕ بە دڵ سپاس و ڕێزی بێ‌پایانی خۆمانتان پێشکەش بکەین و بڵێین نەتەوەیەک کە ئێوە تێکۆشەر و خەمخۆری بن لە بەرامبەر هیچ دەسەڵات و حکوومەتێکدا دەستەوەستان نابێت و تەسلیمی ویستی هیچ دیکتاتۆرێک نابێ.
ڕێژیمی کۆماری ئیسلامی ئەمساڵیش بە نەریتی ساڵانەی خۆی پێش هاتنی نەورۆز لە ڕێگای دامودەزگا ئیتلاعاتییەکانییەوە دەستی دایە هەڕەشە و گوڕەشە و بانگکردن و لێپیچینەوە لە چالاکانی مەدەنی و لاوانی نیشتمانپەروەر و هەڕەشەی ئەوەی لێکردن کە نابێ ڕێوڕەسمەکانی نەورۆز وەکوو ساڵانی پێشوو بەڕێوە بچێ و تەنانەت لە هەندێ شوێن هەڕەشەی کردبوو کە نابێ جلوبەرگی کوردی لەبەر بکرێ. لە لایەکی دیکەشەوە هاوکات لەگەڵ ئەو گوشارانە، لە ڕێگای چەند کەسێکی گوێڕایەڵی خۆیەوە ویستی بە خەڵک بڵێ کە ڕێوڕەسمە نەورۆزیەکان دژی ئایینی ئیسلامە و بەلكوو بکرێ لەو ڕێگایەشەوە پێشی پێ بگرێ، بەڵام بە پێچەوانەی ویستی ڕێژیم، هەمووان ئاکامی ئەو سیاسەتە شکستخواردووەی دەسەڵاتدارانی کۆماری ئیسلامیمان بینی و دیتمان کە ئەمساڵ چەندە بە جۆش و خرۆشێکی زیاترەوە ئاگری نەورۆز لە سەرانسەری کوردستان هەڵکرا و دیتمان کە خەڵک چەند بە حەماسەت و شکۆوە بەشداریی ڕێوڕەسمە نەورۆزییەکانیان کرد.
ڕێژیم کە ئاسۆیەکی ڕوونی بۆ سیاسەتی هەڕەشە و فریو بەدی نەدەکرد لە لایەکی دیکەوە پیلان و پلانی ئەوەی هەبوو کە ئەوساڵ ڕێوڕەسمەکانی نەورۆز بخاتە ژێر کۆنتڕۆڵی خۆی و ئەوەندەی بۆی بکرێ لە مانای خۆی بەتاڵی بکا و لەولاشەوە بە دنیای دەرەوە بڵێ کە لە کوردستان نەورۆز بە ئازادانە دەگیرێ، بەڵام شکۆی نەورۆزی خەڵک و ڕێوڕەسمەکانی خەڵکی کوردستان ئەو سیاسەتەی ڕێژیمی کردە بڵقی سەر ئاو.
ناوەندە ئیتلاعاتییەکانی کۆماری ئیسلامی کە بە تەواوی هەستیان بە شکستی سەرشۆڕانەی خۆیان دەکرد، هەر ڕۆژی نەورۆز و دواتر دەستیان دایە گرتن و دەسبەسەرکردنی خەڵکی کوردستان و دەیان کەس لە چالاکان و لاوانی نیشتمانپەروەر و تەنانەت چەندین کەسی بەساڵاچووشیان دەسبەسەر کرد.
هاونیشتمانییانی خۆشەویست جارێکی دیکە وێڕای سپاس و پیرۆزبایی دووبارەمان بەبۆنەی نەورۆز و سەرکەوتنی ئێوە لە بەرامبەر ڕێژیمدا، سەرنجی هەموو لایەک بۆ ئەو پەیامە بەهێزەی نەورۆزی ئەوساڵ ڕادەکێشین و پێداگریی لەسەر دەکەینەوە کە گەلی ئێمە ئەمساڵ بە درووشمی یەکگرتوویی و یەکڕیزی ئەو سەرکەوتنە مەزنەی وەدەست هێنا، هەر بۆیە جەخت لەسەر ئەوە دەکەینەوە کە خەڵکی بەهەڵوێستی کوردستان و تێکۆشەرانی گەل پێویستە هەموومان ئەو درووشمە بکەینە مەشغەڵی ڕێگای خەباتمان و تا سەرکەوتنی یەکجاری بەسەر داگیرکەرانی کوردستاندا دەست لەناو دەست درێژە بە خەباتی خۆمان بدەین.
هیوای سەرکەوتن و سەرفرازی بۆ هەموو لایەک.
ناوەندی هاوکاریی حیزبەکانی کوردستانی ئێران
٧ی خاکەلێوەی ٢٧٢٢ی کوردی
٢٧ی مارسی ٢٠٢٢ی زایینی
