نزیكەی سەدی ٣٠ یەكە پیشەسازییەكانی پارێزگای ورمێ لە كار و چالاكی وەستاون، بەڵام ئەم ڕێژەیە لە مەهاباد لە سەدی ٤٠ زیاترە.
مێهدیزادە، بەڕێوەبەری گشتیی شارۆچكە سەنعەتییەكانی پارێزگای ورمێ لە كۆبوونەوەی ئیمزای ڕێككەوتنامەی بازاڕچەی سنووریی شارەكانی مەهاباد و سەردەشت لە فەرمانداریی مەهاباد وێڕای ئاماژە بە ئامارە ڕەسمییەكانی ئێران لە بابەت یەكە سەنعەتییە ناچالاكەكان لە وڵاتدا گوتی: بەپێی دوایین لێكۆڵینەوەكان نزیكەی سەدی ٢٠ی یەكە بەرهەمهێنەرەكانی ئێران لە كار وەستاون، بەڵام ئەوە لە پارێزگای ورمێ زیاترەو لە حاڵی حازردا نزیكەی سەدی ٣٠ كارگە بەرهەم هێنەرەكانی ئەو پارێزگایە ناچالاكن.
لەم كۆبوونەوەیەدا سەرۆكی ئیدارەی سەنعەت، كانزا و تیجارەتی مەهابادیش باسی لە داخران و نیوەچالاك بوونی ٦٣ یەكەی بەرهەمهێنەری سەنعەتی لەم شارە كرد.
قادری لەم بارەوە گوتی: شاری مەهاباد ١٤٣ كارگەی سەنعەتی هەیە كە ٨٠ یەكە لەم یەكە پیشەسازییانە لە شارۆچكەی سەنعەتیی ئەم شارەدا هەڵكەوتوونو، لە حاڵی حازردا ٣٦ یەكەی سەنعەتی لە شاری مەهاباد بەهۆی گیروگرفتی زۆری ماڵی لە كار و چالاكی كەوتوون و ٢٧ یەكەی دیكەش بە نیوەی بارستایی خۆیان خەریكی وەبەرهێنانن.