بۆ ڕێزلێنان لە یادو بیرەوەریی هونەرمەندی بەناوبانگ و شاعیری ناوازەی كورد مامۆستا هێمن موكریانی، لە مۆزەخانەی مەفاخێری فەرهەنگی و هونەریی شاری مەهاباد لە “ماڵی هێمن” ڕێوڕەسمێك بەڕێوەچوو.
ئەم ڕێوڕەسمە ڕۆژی شەممە ٢٨ی خاكەلێوە بەڕێوەچوو، بەیانی ڕۆژی بەڕێوەچوونی ڕێوڕەسمەكە كۆمەڵێك لە قوتابییانی قوتابخانەكانی مەهاباد بە ڕێزلێنان لە كەسایەتیی بەرزی مامۆستا هێمن یاد و ناوی ئەم شاعیرە بلیمەتەیان بەرز نرخاند. لە بڕگەی ئێوارەشدا ئەم مۆزەخانەیە خانەخوێی كۆمەڵێكی یەكجار زۆر لە شاعیران، ئەدیبان، هونەرمەندان و فێرخوازانی ڕێكخراوی زمانی كوردیی سۆما بوو.
لە سەرەتای ئەم ڕێوڕەسمەدا سەلاح پایانیانی، بەرپرسی مۆزەخانەی مەفاخێر و هونەرمەندانی شاری مەهاباد، كەسایەتیی مامۆستا هێمنی ناساند و پڕژایە سەر تایبەتمەندییە ئەخلاقی، زانستی و ئەدەبییەكان و كەسایەتیی بەرزی مامۆستا هێمن و دەور و ڕۆڵی ئەم هونەرمەندە هەڵكەوتەیە لە بواری هونەر و فەرهەنگ و كاریگەریی ئەو لەسەر كۆمەڵگای كوردی. ئەو لە درێژەدا هیوای خواست كە لە ساڵانی داهاتوودا ڕێوڕەسمی ڕێزلێنان لە یاد و بیرەوەریی شاعیری بەناوبانگی كورد مامۆستا هێمن موكریانی بە شكۆیەكی زیاترەوە بەڕێوە بچێ.
بەرپرسی مۆزەخانەی مەفاخێر وێڕای ئاماژە بەم بابەتە كە لە ئێستادا لە لایەن ئەم مۆزەخانەوە دەستیان بە توێژینەوە لە بواری ژیاننامەی ناوداران و بەرهەمەكانیان كردووەو لە یەكەم هەنگاویشدا هەوڵی نووسینەوە و كۆكردنەوەی ژیاننامە و بەرهەمە ئەدەبییەكانی وەرگێڕی بەناوبانگی كورد “محەممەد قازی”یان داوە و هاوکات لە قۆناغی سەرەتایی دەسپێكی لێكۆڵینەوە لە بەرهەمەكانی عەبدوڵڕەحمان شەڕەفكەندی ناسراو بە هەژار دان.
لە كۆتایی ئەم ڕێوڕەسمەدا ڕەسووڵ كەریمی ناسراو بە مامۆستا سووتاو چەند قسەیەكی بۆ بەشدار بووان كرد و بە پێشكێش كردنی چەند پارچە شێعرێك ڕێزی لە یاد و ناوی ئەم شاعیرە مەزنە گرت