نوێنەری پارێزگای ورمێ لە شورای بەرزی پارێزگاكان گوتی، سەدی ٢٥ی پیاوانو سەدی ٤٥ ژنانی دەرچووی زانکۆ لەم پارێزگای ورمێ بێكارن.
ئیرەج سلێمان زادە، نوێنەری پارێزگای ورمێ لە شاری نەغەدە لە شورای باڵای پارێزگاكان وێڕای ئاماژە بەوەی كە سەدی ٤ی حەشیمەتی ئێران لەم پارێزگایەدا نیشتەجێن، گوتی پشكی پارێزگای ورمێ لە بەرهەمی میللی تەنیا کە سەدی٢ کەمترە، هەر بۆیە لە نێوان پارێزگاكانی ئێراندا هیچ هاوسەنگیەك بوونی نییەو دەرفەتو ئیمکانات بە شێوەیەكی عادڵانە دابەش نەكراوە.
ناوبراو ئاماژەی بە گیروگیفتە سەرەكییەكانی ئەم پارێزگایە كردو گوتی بێكاریی لاوانی خوێندەوار یەكێك لە قەیرانە گرینگەكانی ئەم پارێزگایەیەو لە ئێستادا سەدی ٢٥ پیاوانو سەدی ٤٥ ژنانی دەرچووی زانکۆ لەم پارێزگایەدا بێكارنو هیچ كارێكی ئەوتۆ ناکەن.
سلێمان زادە هەروەها گوتی، لە پارێزگای ورمێ زۆربەی پڕۆژەی جادەو ڕێگاوبانەکان کە مەرجی سەرەکیی ژێرخانی ئابوورین، سەدی ٣٠یان تەواوبووەو سەدی ٧٠ ی بە نیوەچڵی ماونەتەوە.