بەڕێوەبەری گشتیی پێشووی دەرمانو پشتیوانییە كۆمەڵایەتییەكانی ستادی بەرەنگاربوونەوەی مادەی هۆشبەر وێڕای بەداخبوون لە پەرەسەندی ئێعتیاد لە ئێرانو پشتگوێخستنی بابەتی پشتگیری، دەڵێ حەیفە هەموو کاتو توانای ستاد تێچووی پێڕاگەیشتنو کۆکردنەوەی ٣٠ هەزار موعتادی سەرشەقام بكرێ، لە حاڵێكدا ٣٠ میلیۆن لاو لە ئاستی ئێراندا پشتگوێ خراون.
فەرید بەراتی وێڕای ئاماژە بە بەرزبوونی نرخی بێكاری لە نێو حەشیمەتی خوێندەوارو دەرچووی زانکۆو ئاماری ٤ تا ٥ میلیۆن كەسی بێكار لە ئێراندا گوتی: ئەم بابەتانە بۆ خۆیان بەستێن بۆ بەكارهێنانی مادەی هۆشبەر خۆش دەکەن.
بەراتی وێڕای پێداگریی لەسەر پێویستیی پێشگیری لە ئەم قەیرانە لە كۆمەڵگەدا پشتڕاستی كردەوە كە لە ئێستادا كۆمەڵگەی ئێران لە پێوەندی لەگەڵ مادەی هۆشبەردا بایەخ بە پرسی پێشگیری ناداو؛ دامودەزگا جۆاوجۆرە حکومییەکانی وەك دەنگو ڕەنگو بێهزیستیش كە ئەو ئەرکەیان لە ئەستۆیە، هیچ كامیان لەسەر بابەتی پێشگیری کار ناكەنو پرسی پێشگیری لە زانكۆكان، قوتابخانەكانو شوێنەكانی كاریش کاری لەسەر ناكرێ.
بەراتی هەروەها پێداگریی كردەوە كە پەروەردەو بارهێنان لەو پێوەندییەدا هەر چاپی كتێبو تراكت نییە، بەڵكوو پێشگیری بەرنامەیەكی ئامنجداری درێژخایەنەو پێویستیی بە پسپۆڕو بوودجەی باش هەیە.
ئەم مامۆستای زانكۆیە وێڕای ئاماژە بە نەبوونی بەرنامە بۆ كۆمەڵگە گوتی هیچ شادیو دڵخۆشییەک لە كۆمەڵگەدا نییە، هەر بۆیە خەڵكیش لە هەوڵی دروستكردنی شادیی ناسروشتین. بۆ نموونە لە ئێراندا ئیزن نادەن كۆنسێرتیش بەڕێوە بچێو سروشتییە كە خەڵك بە هەر شێوەیەك بێ پێویستیان بە شادی هەیەو بە ناچاری بەدووی ڕێگەو شێوازەکانی دیکە دڵخۆشیدا دەچن.