لە شاری شنۆ لاوانی شۆڕشگێر ڕووبەڕووی هێزە دژیگەلییەکانی ڕێژیم بوونەوە و جێژنی نەورۆزیان بەشکۆوە بەڕێوە برد، لە دژکردەوەدا هێزە تێرۆریستەکانی بەناو ئینتزامیی ڕێژیم گازی فرمێسکڕێژ و فیشەکیان بەرامبەر لاوانی شۆڕشگێڕی شنۆ بەکار هێنا و چەند لاوی شنۆیی بەهۆی هێرشی هێزی دژیگەلیی ئینتزامیی ڕێژیم لەو شاره بریندار بوون. هەروەها لە شاری پیرانشار و گوندەکانی نمنجێ، گەزگەسک و سۆغانلوو بە بەشداریی جەماوەر و بە بەڕێوەبردنی سەمای جامانەکان، نەورۆز بەشکۆوە بەڕێوە چوو.
لەلایەکی دیکە جێژنی نەتەوەیی نەورۆز لە زۆربەی شار، شارۆچکە و گوندەکانی ڕۆژهەڵاتی کوردستان، سەرەڕای بەربەستەکانی بەکرێگیراوانی ڕێژیم بەڕێوە چوو، بەڵام بەکرێگیراوانی ڕێژیم پێشیان بە بەڕێوەچوونی ئاهەنگەکانی نەورۆز لە گوندەکانی سیسێر و نستان لە ناوچەی ڕەبەت گرت.
بەو حاڵەش سەرەڕای هەموو گوشارەکان ئاهەنگی جێژنی نەورۆز بە بەشداریی جەماوەرێکی بەرچاو لە گوندەکانی تەنگیسەر، حەسەناوا و گاوەرەی سنە بەڕێوە چوو.
هەر لەو چوارچێوەیەدا ئاهەنگی جەماوەریی نەورۆز لە قەراخ بەنداوی مەهاباد و چوارڕێیانی ئازادیی ئەو شارە و هەروەها سەرەڕای کەشی ئەمنییەتی لە گوندی کۆسەکەرێز بەڕێوە چوو.
لە گوندی زەردەی ناوچەی داڵاهۆش، جێژنی نەورۆزی کوردەواری بەشکۆوە بەڕێوە چوو.
هەروەها لە شاری ورمێ سەرەڕای ڕێگری و هەڕەشەکانی بەکرێگیراوانی ڕێژیم و بەشێک لە تورکە ڕەگەزپەرەستەکان، لاوانی کورد جێژنی نەورۆزیان بەشکۆوە بەڕێوە برد.
