مانگرتنی بازاڕییەکانی بانە بۆ ناڕەزایەتی دەربڕین بە داخرانی سنوورەکان

لە شاری بانە کۆبوونەوەیەکی بەرینی ناڕەزایەتی دەربڕین بە داخرانی سنوورەکان وەڕێ‌خرا.
بەپێی ڕاپۆرتی پەیامنێری کوردستان‌و کورد بەیانیی ڕۆژی شەممە، ٢٨ ی خاکەلێوە سەدان کەس لە دوکاندارەکان، خەڵکی بازاڕی‌و کۆڵبەرانی ئەو شارە لە بەردەرکی فەرمانداری کۆبوونەوەو ناڕەزایەتیی خۆیان سەبارەت بە خەمساردیی کاربەدەستانی شار ڕاگەیاند.
ئەو کۆمەڵە خەڵکە ناڕازییە دەڵێن ماوەیەکی زۆرە بازاڕچە سنوورییەکان بە بڕیاری کاربەدەستانی ئێران داخران‌و نایەڵن بارو کەلەپەل بێتە خوارێ، هەروەها کرێی دووکانەکان لە بازاڕ زۆر لە سەرێ‌یەو لەو بێ‌بازاڕییەدا بە خەڵکی دابین ناکرێ‌و کۆڵبەرانی ناڕازیش دەڵێن بەهۆی داخرانی بازاڕچەکان ئەوان لە کار بێکار بوون‌و کێشەی بژیویان هەیە.
پەیامنێری کوردستان‌و کورد دەڵێ هاوکات لەگەڵ کۆبوونەوەی خەڵک لە بەردەم فەرمانداریی شاری بانە زۆربەی زۆری دووکان‌و پاساژە سەرەکییەکانی شار داخراون.