کچ و کوڕانی کوردستان بۆ پاراستنی فەرهەنگ و کەلتووری کوردەواری، بەبۆنەی هاتنی نەورۆز و ساڵی نوێی ١٤٠١ی هەتاوی، لە شارە جیاجیاکان بە درووشمی تایبەت بە نەورۆز چاڵاکی تەبلیغییان بەڕیوەبرد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی چوارشەممە ٢٥ی ڕەشەمەی ١٤٠٠ی هەتاوی، خەڵکی شۆڕشگێڕ و کچ و کوڕانی نیشتمانپەروەری کوردستان، لە پێشوازیی هاتنی نەورۆز و سەری ساڵی نوێی ١٤٠١ی هەتاوی، لە شار و شارۆچکە جیاجیاکانی کوردستان بە بڵاوکردنەوەی درووشمی تایبەت بە نەورۆزی کوردەواری، سەرەرای بەربەستەکانی کۆماری ئیسلامیی ئێران چالاکیی تەبلیغییان بەڕێوەبرد.
هەموو ساڵێک لە پێشوازیی نەورۆز و سەری ساڵی نوێی کوردەواری، کۆماری ئیسلامیی ئێران هەوڵی داوە کە پێش بە ڕێوڕەسمەکانی نەورۆز و هەموو ڕێوڕەسمەکانی دیکەی نەتەوەی کورد بگرێ، بەڵام کچ و کوڕانی ئەوینداری نیشتمان، بۆ پاراستنی فەرهەنگ و کەلتووری نەتەوەیی خۆیان، هیچکات گوێیان بە هەڕەشەکانی تاران نەداوە و لە ژێر زەبر و زەنگیشدا بووبێ ڕێوڕەسمە نەتەوایەتییەکانی خۆیانیان پەک نەخستووە و پێشوازیی بەرینی خەڵکی شۆڕشگێڕی کوردستان لە نەورۆزی کوردەواری “نا”ـیەکی توند بووە بۆ کۆماری ئیسلامیی ئێران.
