بەبۆنەی پێشوازی لە نەورۆز و ساڵی نوێی ١٤٠١ی هەتاوی، لە شار و ناوچەکانی کوردستان ڕێوڕەسمی چوارشەممە سووری بەڕێوە چوو.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ئێوارەی ڕۆژی سێشەممە ٢٤ی ڕەشەمەی ١٤٠٠ی هەتاوی، لە پێشوازی لە نەورۆز و ساڵی نوێ، سەرەڕای بەربەستەکانی کۆماری ئیسلامیی ئێران لە تەواوی شار و ناوچەکانی کوردستان بە بەشداری هەزاران کەس بە گۆڤەند و هەڵپەڕکێ ڕێوڕەسمی چوارشەممە سووری بەڕێوە چوو.
وێڕای بەربەستی هێزە سەرکوتکەرەکانی ڕێژیمی ئێران لە کوردستان، خەڵک و لاوانی شۆڕشگێڕی کورد بە گوێنەدان بە بڕیارەکانی تاران ئەمساڵیش وەکوو ساڵانی ڕابردوو لە پیشوازی نەورۆزدا، بەشکۆوە ڕێوڕەسمی چوارشەممە سوورییان بەڕێوە برد و ئەمەش پەیامێک بوو بۆ دەسەڵاتی ئاخوندی کە هیچکات ناتوانێ ڕێگری لە چالاکیی فەرهەنگی و کلتووری نەتەوەی کورد بکا.
