لەماوەی یەک ساڵی ڕابردوودا ١٧٠ حاڵەتی جیاوازی توندوتیژی لە شار و ناوچەکانی ڕۆژهەڵاتی کوردستان بەدژی ژنان ڕووی داوە.
بەپێی ئامارەکانی ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە سەرەتای مارسی ٢٠٢١ تاکوو مارسی ٢٠٢٢ی زایینی، زیاتر لە ١٧٠ حاڵەتی توندوتیژیی جیاواز و جۆراوجۆر لە شار و ناوچەکانی ڕۆژهەڵاتی کوردستان ڕوویان داوە.
بەپێی ئەو ئامارانە لەماوەی ئەو یەک ساڵەدا ٣٥ چالاکی ژنی کورد لەلایەن هێزە سەرکوتکەرەکانی ڕێژیمی ئیسلامیی ئێرانەوە دەسبەسەر کراون کە ١٢ کەسیان لەلایەن دەزگای قەزایی ڕێژیمەوە سزای بەندکردنیان بەسەردا سەپاوە، کە ٥ کەسیان مێرمنداڵ و تەمەنیان ژێر ١٨ ساڵ بووە و ٧٤٪ی کۆی دەسبەسەرکراوەکانیش بە تۆمەتی چالاکی سیاسی و پێوەندی لەگەڵ حیزبە کوردستانییەکانی دژبەری ڕێژیمی ئێران دەسبەسەر کراون.
هەر لەم پێوەندییەدا بەپێی ئامارێکی ناوەندی ئامار و بەڵگەنامەکانی ڕێکخراوی مافی مرۆڤی هەنگاو، هەر لەو ماوەیەدا ٩٤ ژن لە شار و ناوچە جیاجیاکانی کوردستان خۆیان کوشتووە و ٤١ ژنیش کوژراون.
بەپێی ئەم ئامارانە ژنکوژی بەنیسبەت ماوەی هاوشێوەی ساڵی ڕابردوو ١٢ حاڵەت (٣٠٪) زیادی کردووە و ڕێژەی خۆکوشتنی ژنان ١٤ حاڵەت (١٥٪) کەمی کردووە.
