ئەندامێكی كۆمیسیۆنی پیشەسازیو سامانەكانی مەجلیس ڕایگەیاند كە بوودجەی خۆڵبارین، بووژاندنەوەی تاڵاوەكانو گۆلی ورمێش لە لایەحەی بوودجەی ساڵی ٩٥ ڕەش کراونەتەوە.
سەیدشەریف حوسێنی گوتی، دەوڵەت لە لایەحەی ساڵی نوێی دەوڵەتدا هیچ بوودجەیەكی بۆ قەیرانی خۆڵبارینەکان كە نیوەی وڵاتی بەخۆیەوە سەرقاڵ كردوە، لەبەرچاو نەگرتەوە.
نوێنەری خەڵكی ئەهواز لە مەجلیس گوتی، بەپێچەوانەی قسەكانی سەرۆكی ڕێكخراوی ژینگەپارێزی كە گوتبووی چارەسەریی خۆڵبارینەكان چەند ساڵێكی پێویستە، لە لایەحەی بوودجەی ساڵی ٩٥ دا هیچ بوودجەیەك بۆ ئەم مەبەستە بۆ تەرخان نەكراوە.
ئەم نوێنەرەی مەجلیسی نۆهەم لە درێژەدا گوتی لە ٦٠ میلیارد تمەن بودخەی پەسندكراوی ساڵی ٩٤ بۆ خۆڵبارینەكان تەنیا ٢ میلیارد تمەن بۆ پارێزگای خوزستان تەرخان كراوە، بەم بارودۆخەش وێدەچێ كە دەوڵەت توانای چارەسەریی خۆڵبارینەكانی نەبێ، بۆیە هیچ بوودجەیەكی ئەوتۆی بۆ دابین نەكردوە.
ناوبراو پشتڕاستی كردەوە كە دەوڵەت لە دابینكردنی بوودجە بۆ کێشەی خۆڵبارینەکان چاوپۆشیی كردوەو مەجلیس دەبێ لەو پێوەندییەدا بە لایەحەی بوودجەی ئەمساڵدا بچێتەوە. هەڵبەتە بە لابردنی بوودجەی خۆڵبارین، بوودجەی بووژاندنەوەی تاڵاوەكانو گۆلی ورمێش ڕەش دەکرێتەوە.
