كۆمەڵێك لە كرێكارانی دەركراوی کارخانەی پۆڵای زاگرۆس لە پارێزگای سنە، چەند ڕۆژ لەوەپێش سەبارەت بە ناڕوونیی چارەنووسی نزیك بە ٢٧٠ كەس لە هاوكارەكانیان لە ئاكامی داخرانی ئەم کارخانەیە، لەبەردەم بینای فەرمانداریی شاری قوڕوە كۆبوونەوە.
یەكێك لە كرێكارە ناڕازییەكان كە لەم كۆبوونەوەیەدا بەشداربوو گوتی کێشەو گرفتی كرێكارانی پۆڵای زاگرۆس لە ڕۆژی ١٨ی پووشپەڕی ساڵی ٩٢ ەوە دەستی پێكرد، کاتێک کە بەڕێوەبەرانی ئەم کارخانەیە بە بیانووی جۆراوجۆر کارخانەکەیان داخست.
ناوبراو هەروەها دەڵێ نزیك بە ٢٧٠ كرێكاری كارخانەی پۆڵای زاگرۆس پێشو پاش داخرانی ئەم كارخانەیە لە چەند قۆناغدا دەركرانو لە كۆی ئەم كرێكارە بێكارانە، كارخانەی پۆڵای زاگرۆس لە ئێستادا تەنیا ١٦ كرێكاری لە بەشی نیگابانیو پاراستندا هێشتۆتەوە كە هەروا چارەنووسیان ناڕوونەو لە ماوەی ٨ مانگی ڕابردوودا نە مووچەیان دراوەتێو نە حەقی بیمەکانیان تێکراوە.
بەپێی قسەكانی ئەو کرێکارە ماوەی ئەم ٣ ساڵەدا كرێكاران بۆ دەست بەکاربوونەوەی ئەم كارخانەیەو گەڕانەوەیان بۆسەر كارەكانیان، چەندین جار لەبەردەم ئۆڕگانو دەزگا جیاجیاكانی دەوڵەت لە پارێزگای سنە كۆبوونەتەوە، بەڵام هیچ ئاكامێكی نەبووە.
ئەو دەڵێ كارخانەی پۆڵای زاگرۆس تەنیا سەرچاوەی داهاتی خەڵكی زیاتر لە ٣٠ ئاوایی لە ناوچەی قوڕوە بووە كە ئەگەر ئەم داخرانە بەردەوام بێ، جگە لە بنەماڵەی كرێكاران، بارودۆخی ئابووریی خەڵكی ناوچەکەش دەكەوێتە مەترسییەوە.
