گوڵناز ئاهەنگخۆش دوای تێپەڕكردنی ٢ ساڵ زیندان لە بەندیخانەی ورمێ هێشتا چارەنووسی ناڕوونە.
بەپێی ڕاپۆرتی مافی نیوز، گوڵناز ئاهەنگخۆش لە جۆزەردانی ساڵی ٩٣ لە نزیك ئاوایی بەردەڕەشی ورمێ لەگەڵ چەند كەسی دیكە لە لایەن هێزەكانی سپای پاسدارانەوە دەسبەسەر كران. گوڵناز دوای ٢ ساڵ مانەوە لە زیندان ئێستاش چارەنووسی ناڕوونەو لە هیچ کام لەو ماوەیەدا رێگەی پێنەدراوە پارێزەری هەبێ.
مانگی جۆزەردانی ٩٣ هێزەكانی سپای پاسداران بە بیانووی ئەوەی كە هێزی حیزبە كوردییەكان لە دەورووبەری ئەم ئاوایییەدان ناوچەیان گەمارۆداو تێکهەڵچوونێکیان ساز کرد.
گوڵناز ئاهەنگخۆشو چەند كەسی دیكەش لە نزیك ئەم شەڕو پێكدادانە بە بیانووی ئەوەی كە ویستوویانە پێوەندی بە حیزبە کوردییەکانەوە بکەن، لە لایەن هێزەكانی ئیتلاعات دەسبەسەر كران. لەم كاتەدا گوڵناز بە پڕیشكی خۆمپارەی سپای پاسداران بریندار بوو و بە برینداری دەسبەسەرو زیندانی کرا.
ئەم ژنە كوردە ئێستاش دوای دوو ساڵ مانەوە لە بەندی ژنان لە زیندانی ناوەندیی ورمێ ئێستاش دادگایی نەکراوەو چارەنووسی ڕوون نەکراوە.
