کۆڵبەرێکی خەڵکی سەردەشت لە سنووری بانە بە هۆی تەقینەوەی “مین” لاقێک و چاوێکی لە دەست دا.
بەپێی هەواڵی هەواڵدەییەکان “فواد مەهدی ئیبراهیمیان” تەمەن ٢٤ ساڵ، خەڵکی سەردەشت کە چەند ڕۆژ لەوە پێش لە کاتی کۆڵبەری لە سنووری بانە بە هۆی تەقینەوەی مین بە سەختی بریندار بوو و بۆ نەخۆشخانەکانی شاری تەورێز گوازرایەوە، بە هۆی سەختی برینەکانییەوە لاقی ڕاست و چاوی چەپی لە دەست داوە.
یەکێک لە نزیکانی ئەم کۆڵبەرە لەو بارەوە ڕایگەیاند لە نەخۆشخانەی شاری تەورێز نەشتەرگەری چاو بۆ فواد کراوە کە بەداخەوە سەرکەوتوو نەبووە و چاوی چەپی لە دەست داوە.
فواد مەهدی ئیبراهیمیان پێشتر لە نەشتەرگەرییەکدا لاقی ڕاستی بڕابووەوە و ئێستا لە نەخۆشخانەیەکی شاری تەورێز لە ژێر چاودێریی پزیشکیدایە.
فواد مەهدی ئیبراهیمیان، ڕۆژی دووشەممە ٢ی ڕەشەممەی ١٤٠٠ی هەتاوی لە کاتی کۆڵبەری لە سنووری هەنگەژاڵی بانە بە سەختی بریندار ببوو.
هەروەها لەو ڕووداوەدا دوو کۆڵبەری دیکەش بە ناوەکانی ئامانج ئیبراهیم پوور ٢٢ ساڵە و کیانووش ڕەئووفی ٢٤ ساڵ بریندار بوون.
