وەزیری فەرهەنگ و ئیرشادی ڕێژیم لە سەفەرەکەی خۆیدا بۆ بەیروت: حیزبوڵای لوبنان “هێمای شوێنکەوتوانی ویلایەتە”.
بەپێی هەواڵی هەواڵدەرییەکانی دەنگ و رەنگی ڕێژیمی ئێران، محەممەدمەهدی ئیسماعیلی، وەزیری فەرهەنگ و ئیرشادی کۆماری ئیسلامی لە سەفەرەکەی ئەم دواییانەی خۆی بۆ بەیرووت، حەسەن نەسروڵا سکرتێری گشتیی حیزبوڵای لوبنان و گروپە میلیشیاکانی سەر بەو ڕێژیمەی لە لوبنان بە “هێمای شوێنکەوتوانی ویلایەت” ناوبرد و وتی لوبنان خاڵی دەسپێکی چالاکییە فەرهەنگییەکانی ئێرانە لە ناوچەکەدا و ئێمە شانازی بە خوشک و براکانمان لە لوبنان دەکەین کە نوێنەری سیاسەتەکانی ئێمەن لە ناوچەکەدا و پێوەندی نێوان ئەو دوو وڵاتە بە پێڕەوی‌کردن لە ڕێبازی ئیمام خومەینی سەرمەشقن بۆ جیهانی ئیسلام.
جێی ئاماژەیە کە لوبنان لە ماوەی چوار دەیەی ڕابردوودا لە ژێر کارتێکەریی سیاسی و فەرهەنگی ڕیژیمی ئێراندا بووە و لەگەڵ دەسپێکی شەڕی نێوخۆیی سووریە لە ساڵی ٨٩ی هەتاوی، حیزبوڵای لوبنان بە پشتیوانیکرن لەلایەن سپای پاسدارانی ڕیژیمی ئێرانەوە بۆ هاوکاریکردن بە “بەشار ئەسەد” سەرۆکۆماری سووریە بەشداریی ئەو شەڕەیان کرد.
ڕیژیمی ئێران بە هاوکاری ماڵیی و پشتیوانیکردن لە گرووپە میلیشیاکانی خۆی خەریکی تێکدانی ئاسایش و نانەوەی شەڕ و ئاڵۆزی لە ناوچە و وڵاتانی دەروبەردایە.
