دوای تێپەڕبوونی دوو حەوتوو لە دەسبەسەرکرانی “کەیومەرس لەتیفی” لە چالاکانی مەدەنی و مامۆستایانی زمانی کوردی خەڵکی سنە، هیچ زانیارییەک لەسەر چارەنووسی ناوبراو لەبەردەستدا نییە.
بەپێی ڕاپۆرتی ڕیکخراوی مافی مرۆڤی هەنگاو، دوای تێپەڕینی دوو حەوتوو لە دەسبەسەرکرانی “کەیومەرس لەتیفی” چالاکی مەدەنیی ناسراو و مامۆستای زمانی کوردی خەڵکی شاری سنە، سەرباری بەدواداچوونی بەردەوامی بنەماڵەکەی هیچ زانیارییەک لەسەر چارەنووس و شوێنی ڕاگیرانی لەبەردەستدا نییە و ئەمەش نیگەرانی لای بنەماڵەکەی دروست کردووە.
کەیومەرس لەتیفی تەمەن ٤١ ساڵ، دوای ئەوەیکە هێزە سەرکوتکەرەکانی ئیدارەی ئیتلاعاتی ڕێژیم لە سنە، هەڵیانکووتایە سەر ماڵەکەی و دەسبەسەریان کرد، لەو کاتەوە وێڕای بەدواداچوونی بنەماڵەکەی تا ئێستا هیچ زانیارییەک لەسەر چارەنووسی لەبەردەستدا نییە و ناوەندە ئیتلاعاتییەکانی ڕێژیم لەو بارەوە هیچ وڵامێکیان بە بنەماڵەکەی نەداوە.
شایانی باسە کە، ناوەندە سەرکوتکەرەکانی ئیتلاعات، گوشاریان خستووەتە سەر بنەماڵەی ناوبراو و بەتایبەت خوشکەکانی و لە ئەگەری بەردەوامبوونی بەمیدیایی کردنی ئەو باسە و تەنانەت هەڕەشەی کوشتنیان لە “فەرید لەتیفی” برازای ناوبراو کردووە کە ئێستا نیشتەجێی وڵاتی ئاڵمانە.
