محەممەدئەمین سازگارنژاد، جێگری وەزیری تەعاون، كارو خۆشبژێویی كۆمەڵایەتی و سەرۆكی ڕێكخراوی فێركردنی فەننی و حیرفەیی دەڵێ لە ئاستی ئێراندا ٣ میلیۆنو ٥٠٠ هەزار كەس بێكارن.
سازگارنژاد هەروەها گوتی گرینگترین گیروگرفت لە ئاستی ئێراندا بێكاریو شارەزانەبوونی هێزی مرۆییە.
ناوبراو دەڵێ گیروگرفتی سەرەكیی ڕێكخراوی فێركردنی فەننی حیرفەیی “نرخی بەرزی بێكاری و پێشگرتن بە هەڵوەرینی هێزی كار”ەو داوای كرد كە پێش بە هەڵوەرینی هێزی كار بگیردرێ.
سەرۆكی ڕێكخراوی فێركردنی فەننی و حیرفەیی لە حاڵێكدا باسی لە پاراستنی هێزی كار دەكرد، هەر ماوەی چەند حەوتووی ڕابردوودا بە شێوەیەكی بەرچاو پاش داخرانی یەكەكانی بەرهەمهێنان چەندین هەزار كەس تا ئێستا لەسەر كارەكانیان دەركراون.
هۆكاری سەرەكیی دەركرانی كرێكاران، هەموو جارێ پێدانەدانی مووچەكانیان ڕادەگەیەندرێ.
شایانی باسە كە زیاتر لە ٩ هەزار یەكەی پیشەسازی لە شیركەتەكانی پیشەسازیی ئێران لە ساڵی ٩٣ داخراون و ڕەوتی دەركردن، کەمکردنەوەی هێزی كار و داخستنی یەكەكانی پیشەسازیو بەرهەمهێنان لە ساڵی ٩٤یش بەردەوام بووە بەلام هێشتا ئامارێكی ورد لەبەر دەستدا نییە.