هەیئەتێکی ئەنجومەنی نیشتمانیی کورد (ئەنەکەسە) سەردانی دەفتەری سیاسیی حیزبی دیموکراتی کوردستانی کرد.
ڕۆژی یەکشەممە ٨ی ڕەشەمەی ١٤٠٠ی هەتاوی ( ٢٧ی فێوریەی ٢٠٢٢ی زایینی) هەیئەتێکی ئەنجومەنی نیشتمانیی کورد (ئەنەکەسە) بە سەرۆکایەتیی بەڕێز کاوە ئەزیزی سەردانی دەفتەری سیاسیی حیزبی دێموکراتی کوردستانی کرد و لەلایەن هەیئەتێکی حیزبی دێموکراتی کوردستانەوە بە سەرپەرەستیی بەڕێز خالید عەزیزی سکرتێری گشتیی حیزب پێشوازییان لێکرا.
لە سەرەتای باسەکانی ئەو دیدارەدا بەڕێز کاوە ئەزیزی دۆخی ڕۆژاوای کوردستان و سیاسەتی دەوڵەتانی زلهێز و وڵاتانی دەوروبەری لەسەر دەوڵەت و وڵاتی سووریە بە گشتی و ڕۆژاوای کوردستان بە تایبەت هێنایە بەرباس. ناوبراو هەروەها باسی پێوەندییەکانی نێوان ئەنەکەسە و پەیەدە و گفتوگۆ و لێکتێگەیشتنی دوولایەن و بەردەوامیی پێوەندییەکانی ئەو دوو لایەنە کرد و لە درێژەی باسەکەیدا هەلومەرجی ئێستای سووریە و ئۆپۆزیسیۆنی دەوڵەتی بەشار ئەسەد و کۆبوونەوەکان و داهاتووی سووریە و دەستێوەردانەکانی دەوڵەتانی ناوچەکەی هێنایە بەرباس و ڕا و بۆچوونی ئەنەکەسەی لەو پێوەندییەدا شی کردەوە.
دواتر بەڕێز خالید عەزیزی باسێکی گشتی لەسەر کێشەی کورد لە ناوچەکە و ڕاو و بۆچوونی دەوڵەتی ئەمریکا و وڵاتانی دیکەی هێنایە بەرباس. هەر لەو پێوەندییەدا پرش و بڵاوی و ناکۆکیی لایەنەکانی بە یەکێک لە کۆسپەکانی بەردەم چارەسەری کێشەی کورد لە ڕۆژاوای کوردستان ناو برد. بەڕێز عەزیزی ئەم هەلومەرجەی وڵاتی سووریەی بە دەرفەت زانی بۆ ئەوەی لایەنە کوردییەکان بە یەکڕیزی و یەکگرتوویی لە پشتیوانیی نێودەوڵەتی بە قازانجی کورد و چارەسەری مەسەلەی کورد لە ڕۆژاوا کەلک وەربگرن.
سکرتێری گشتیی حیزبی دێموکراتی کوردستان لە درێژەی باسەکەیدا دۆخی سیاسیی ڕۆژهەڵاتی کوردستان و خەباتی مەدەنیی خەڵک لەنێوخۆی وڵات و پێوەندیی نێوان حیزبەکانی ڕۆژهەڵاتی کوردستانی بۆ هەیئەتی میوان شی کردەوە. هەوڵدان بۆ یەکڕیزی و دەستوەرنەدانی حیزبەکان لە بەشەکانی دیکەی کوردستان بەشێکی دیکەی باسەکەی بەڕێز عەزیزی بوو. بەڕێزیان پێیوابوو کە هەرکام لە حیزبەکان پێویستە خەبات و تێکۆشانیان لە بەشەکانی خۆیاندا بێ و نەبنە هۆی گرژی و ئاڵۆزی بۆ بەشەکانی دیکەی کوردستان.
دواتر بەشدارانی کۆبوونەوەکە ڕا و بۆچوونی خۆیان لەسەر بابەتە پێوەندیدارەکان هێنایە بەر باس و لە کۆتاییدا هەردوو لایەن پێداگرییان لەسەر بەردەوامیی پێوەندییەکانی دوولایەن و هاوکاری و دیدار و چاوپێکەوتنەکان کردەوە.
