پێشمەرگەیکی دێرین و برای شەهیدێکی حیزبی دێموکراتی کوردستان بە ناوی “خدر شیرینی” خەڵکی ئاوایی “سێپەکان”ـی سەربە ناوچەی پیرانشار بەهۆی نەخۆشییەوە ماڵاوایی لە ژیان کرد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی پێنجشەممە ٥ی ڕەشەمەی ١٤٠٠ی هەتاوی، مام خدر شیرینی، پێشمەرگەی دێرینی حیزبی دێموکراتی کوردستان و برای شەهید “محەممەد شیرینی” شەهیدی ڕێگای ئازادی کوردستان، بەهۆی نەخۆشی و بە ساڵاچوونەوە لە گوندی “سێپەکان”ـی سەربە ناوچەی پیرانشار دڵە پڕ لە هیواکەی لە لێدان کەوت و بۆ هەمیشە مالاوایی لە ڕێبازی پڕ سەروەری حیزب و شەهیدانی نیشتمان کرد.
مام خدر پێشمەرگەی دێرین و ڕۆژە سەختەکانی خەباتی ئازادیخوازانەی حیزبی دێموکراتی کوردستان بوو و لەگەڵ ڕاپەڕینی گەلانی ئێران پەیوەست بوو بە ڕێزی پێشمەرگەکانی حیزبی دێموکراتی کوردستان لەو ڕێبازەدا درێژەی خەبات دا و ساڵی١٣٦١ی هەتاوی شەهید محەممەد شیرینی، برای ناوبراو لە شەڕێکی قارەمانانەدا پاش گرتنی پایەگای “گۆڕەمەری” لە نێوان ئاڵوەتان و خدراوێ شەهید بوو، بەڵام مام خدر بە هۆی لێهاتوویی و خۆڕاگری لە خەبات سڵی نەکردەوە و پێداگرانە درێژەی بە خەبات و تێکۆشاندا و تا ساڵی ١٣٦٤ی هەتاوی لەسەر ئیزنی حیزب وەک کەسایەتییەکی نیشتمانپەروەر و دڵسۆز گەڕایەوە سەر ژیانی ئاسایی.
لەلایەن ناوەندی ڕاگەیاندنی حیزبی دێموکراتی کوردستانەوە وێرای خەم و پەژارە بەبۆنەی کۆچی دوایی مام خدرەوە پرسە و سەرەخۆشی خۆمان ئاراستەی بنەماڵەی ناوبراو و هەموو خەڵکی ناوچەی پیرانشار دەکەین و خۆمان بە شەریکی خەمیان دەزانین.
