هاووڵاتییەکی خەڵکی سەلاسی باوەجانی کە کۆتایی وەرزی پاییزی ئەمساڵ لەلایەن هێزەکانی ئیتلاعاتەوە دەسبەسەر کرابوو، سزای بەندکرانی بە سەردا سەپا.
بەپێی هەواڵی هەنگاو “حوسێن ڕەحمانی” تەمەن ٢٧ ساڵ خەڵکی سەلاسی باوەجانی و دانیشتووی جوانڕۆ لەلایەن دادگای شۆڕشی نەغەدە بە سەرۆکایەتی دادوەر “جەواد عەلیزادەعەلیار” سزای ٣ مانگ بەندکران و ٦ مانگ بەندکرانی هەڵپەسێردراوی بەسەردا سەپاوە.
بەوتەی سەرچاوەیەکی ئاگادار ئەم سزایە بە تۆمەتی هاوکاریکردنی حیزبێکی کوردستانی دژبەرێ ڕێژیم بە سەر ناوبراودا سەپاوە.
حوسێن ڕەحمانی ڕۆژی چوارشەممە ٣ی سەرماوەزی ١٤٠٠ی هەتاوی، لە کاتی سەردانی بۆ پیرانشار لەلایەن هێزەکانی ئیتلاعاتی نەغەدەوە دەسبەسەر و بۆ بەندیخانەی ناوەندیی ئەو شارە گوازرایەوە و دوای ٣٧ ڕۆژ بەندکران بەدانانی بارمتە و بەشێوەی کاتی ئازاد کرابوو.
