سێناتورێکی کۆماریخواز، هەوڵەکانی دەوڵەتی جۆ بایدێن بۆ لابردنی هێندێک لە گەمارۆ ناوکییەکان لەسەر ڕێژیمی ئێران بە نابەجێ و لە چوارچێوەی لاوازکردنی دەسەڵاتی کۆنگرە ناو دەبا.
تێد کرووز، سێناتۆری کۆماریخواز، ڕۆژی یەک‌شەممە ١٧ی ڕێبەندانی ١٤٠٠ی هەتاوی، لە تۆڕی کۆمەڵایەتیی تویتێر سەبارت بە هەڵوەشاندنەوەی هێندێک لە گەمارۆ ناوکییەکان لەسەر ڕێژیمی ئێران، سەرەڕای ئاماژە بە نابەجێ بوونی ئەو بڕیارە، وتی: ئەو بڕیارەی دەوڵەتی جۆ بایدێن لە چوارچێوەی لاوازکردنی دەسەڵاتی کۆنگرەیە و ئەم هەوڵانەی دەوڵەتی بایدێن ڕووبەڕووی کاردانەوەی توندی کۆنگرە دەبێتەوە.
ناوبراو لە درێژەدا دەڵێ: دەوڵەتی بایدێن بە هەڵوەشاندنەوەی گەمارۆ ناوکییەکان لەسەر ڕێژیمی ئێران، ئیزن و دەرفەت دەدات بەو ڕێژیمە کە پەرە بە چالاکییە ناوکییەکانی بدا.
سێناتۆر تێد کرووز لە کۆتاییدا سەرەڕای ئاماژە بەوەی کە؛ جۆ بایدێن سەرۆک‌کۆماری ئەمریکا و بەرپرسەکانی دیکەی دەوڵەتی بایدێن، دەسەڵاتی یاسایی کۆنگرەی ئەمریکا لە پێش چاو ناگرن، وتی: کاتی ئەوە هاتووە یەکجار بۆ هەتاهەتایە کۆتایی بە هەڵوەشاندنەوەی گەمارۆکانی سەر ڕێژیمی ئێران بێنین.
