“بایزید محەممەدپوور”، برای دوو شەهیدی حیزبی دێموکراتی کوردستان لە شاری شنۆ ماڵاوایی لە ژیان کرد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی هەینی رێکەوتی ٨ی ڕیبەندانی ١٤٠٠ی هەتاوی، “بایزید محەممەدپوور” ناسراو بە بایزید خاتوون باغی، برای دوو شەهیدی فەرماندە، شەهید “قاسم محەممەدپوور” و “عومەر محەممەدپوور”، لە شاری شنۆ ماڵاوایی لە ژیان کرد.
کاک بایزید کەسێکی نیشتمانپەروەر و خۆشناوی نێو خەڵکی ناوچەی شنۆ و شاری شنۆ بوو و هەردەم وەفادار بە حیزبی دێموکرات و ڕێبازی شەهیدان مایەوە و هەمیشە وەک ئەندامێکی بنەماڵەی سەربەرزی شەهیدان خۆی بە درێژەدەری ڕێگای شەهیدان دەزانی.
جێی ئاماژەیە کە شەهیدان قاسم و عومەر محەممەدپوور، لە فەرماندەرانی دیاری ناو حیزبی دێموکرات لە ناوچەی شنۆ بوون کە لە شەڕ بەدژی داگیرکەرانی کوردستان، تێکەڵ بە کاروانی نەمرانی مێژوو بوون.
ناوەندی ڕاگەیاندنی حیزبی دێموکراتی کوردستان، بەبۆنەی کۆچی‌دوایی کاک بایزید محەممەدپوور، سەرەخۆشی لە بنەماڵەی سەربەرزی “محەممەدپوور” و خەڵکی شۆڕشگیڕی ناوچەی شنۆ دەکا و خۆی بە شەریکی خەمیان دەزانێ.
