سادق لاریجانی، سەرۆكی دەزگای قەزایی ئێران لە كۆبوونەوەی كاربەدەستانی پلەبەرزی قەزایی ئێراندا گوتی: بردنە ژێر پرسیاری دەسكەوتە مووشەكییەكانی ئێران خیانەتەو دادستانەكانی سەرتاسەری ئەم وڵاتە لەگەڵ هەر بۆچوونێك كە بە قسەی سەرۆكی دەزگای قەزایی ئێران لە بواری لاوازكردن یان لەنێو بردنی دهسەكەوتە نیزامی، ئەمنیەتیو مووشەكییەكانی ئێرانەوە هاتبێتە ئاراوە، بەرەوڕوو دەبنەوە.
سادق لاریجانی دانە بەر ڕەخنەی تاقیكارییە مووشەكییەكانی سپای پاسدارانی به ههوڵێک له پێناو سیاسهتی ڕاگەیەنە ڕۆژاواییەكان زانی كە دەڵێن كەلێنێكی گەورە كەوتۆتە نێوان خەڵكی ئێرانو كاربەدەستانی كۆماری ئیسلامییەوەو خەڵكی ئەم وڵاتە لە نیزامی كۆماری ئیسلامی ناڕازین.
سەرۆكی دەزگای قەزایی ئێران بەبێ ئەوەی كە ڕاشكاوانە ئاماژە بە ناوی ئەكبەر هاشمیی ڕەفسەنجانی بكا، زۆر بە توندی ڕەخنەی لە هەڵوێستگرتنی ئەم دواییانەی ئەو لە بابەت تاقیكارییە مووشەكییەكانی سپای پاسداران گرتو ئەم هەڵوێست گرتنەی بە خیانەت كردن بە وڵات ناو برد.
پاسدار مەسعوود جەزایری، جێگری تەبلیغاتیی ستادی گشتیی هێزە چەكدارەكانی ئێرانیش، لە ڕادەربڕێنێكی جیاوازدا گوتی كە توانای مووشەكیی سپای پاسداران هێڵی سووری كۆماری ئیسلامیی ئێرانەو ڕێگە بەهیچ كەس و لایەنێك نادرێ كە ئەم هێڵە ببەزێنێ.
جەزایری بۆ جارێكی دیكەش داوای لە دەوڵەتی حەسەن ڕووحانی كرد كە بە كردەوە هەنگاو بۆ جێبەجی كردنی دروشمی خامنەیی لە بابەت ئابووریی خۆڕاگری هەڵبێنێتەوەو گوتی كلیلی چارەسەری گرفتە ئابوورییەكانی ئێرانیش لە دەستی بیانییەكاندا نییە، بەڵكوو ئەم كلیلە لە دەستی هێزە چەكدارەكانی كۆماری ئیسلامی دایە.
