سپاسنامەی بنەماڵە و مەڵبەندی هونەریی ماملێ بۆ کوردکاناڵ

مەڵبەندی هونەریی ماملێ و بنەمالەی هونەرمەند محەممەد ماملێ، سپاسنامەیەکیان ئاراستەی تەلەڤزیۆنی کوردکاناڵ کرد.

ڕۆژی چوارشەممە، ٦ی ڕێبەندانی ١٤٠٠ی هەتاوی، مەڵبەندی هونەریی ماملێ لە شاری مەهابادی ڕۆژهەڵاتی کوردستان و بنەماڵەی هونەرمەندی نەمر محەممەد ماملێ، سپاسنامەیەکیان ئاراستەی تەلەڤزیۆنی کوردکاناڵ کرد کە دەقی سپاسنامەکە بەم شێوەی خوارەوەیە:
“تێکۆشەران، کوڕان و کچانی ماندوویینەناس لە “کورد کاناڵـ”ـە ڕەنگینەکەی کوردستان.
وێڕای سڵاوێکی گەرم.
لە شەوانی ڕابردوو، چەشنی ساڵەکانی پێشوو، ماملێی خۆتان بە تەنیا جێنەهێشت و ڕێک لە ٢٣هەمین ساڵیادی مەرگی ئەو هونەرمەندەدا، یادێکی ڕازاوەتان کردەوە و گوڵوەکێڵی ماملێتان کرد کە هەڵگری ئەو پەیامە بوو: (ڕاستە ئەوڕۆ ٢٣ ساڵ لە کۆچت تێدەپەڕێ، کەچی لە لامان هەر زیندووی و نامری).
بە حەق هەر ئەو هەڵوێستە لە ئێوەی خەباتگێڕانی ئەو خاکە دەوەشێتەوە، ئێوەن کە کولتووری باوەڕبەخۆبوون و خۆبەکەمنەگرتن ڕۆدەبەنە ناو هزر و ئاوەزی وەچەی داهاتوومان، ئێوەن ئەستووندەکی تاوڵی کوردایەتی دەچەقێنن و چیخی پاراستنی بۆ ڕادەئەنگێون، ئێوەن دادەڕێژن کە چۆن دەبێت ڕوح وەبەر خزمەتکارانی ئەو خاکە بهێنینەوە، ئێوەن دەپرژێنن ڕوحی نەتەوەیی، ئێوەن دادەپڕژێنە سەر پیرۆزییەکانی نەتەوەمان.
بۆیە بە پێویستی دەزانین ئەوپەڕی سپاسوێژیی خۆمانتان پێ ڕابگەیەنین و دەستە ماندووەکانتان بە گەرمی بگوشین، ئاوات دەخوازین کە شاشەی ڕەنگینتان لە گەشە بێ و وەک هەمیشە پێناودار بن لە ئاست نش‌ونماپێکردنی فەرهەنگ و هونەری کوردستان.

هەر بژین
مەڵبەندی هونەریی ماملێ و بنەماڵەی ماملێ
26ی ژانوییەی ٢٠٢٢
٦ی ڕێبەندانی ١٤٠٠”