لە وەرزی ڕەهێڵەی بەفر و تەزووی سەرمای زستان، لە گۆڤەندی شەختە و سەهۆڵبەندان، ڕێبەندان بوو بە هیوای بندەستان، گەرچی تووش و سەخت و دژوار بوو، بەڵام موژدەی هیوای کوردی پێ‌بوو، بەرهەمی ژێـــکافــی ژیانەوەی کوردان، بوو بە مانگی دامەزراندنی یەکەمین کۆماری کوردستان.
پێش کۆمار دەمێک بوو گەلی دابەشکراوی کورد ببووە دەستەچیلەی ئاگر و لە چوار لاوە گڕ و گولـلە و بۆمب و باڕووتی بەسەردا دەباری و خۆزگە و هیوا و ئاواتەکانی تێکەڵاوی فرمێسک و خەم و خوێن دەکران، دەمێک ساڵ بوو کورد و ژان و ئازار ئاوێتەی یەک بوون، ئەییامێک بوو زارۆک و ژن و مێر و تەنانەت دار و بەردی نیشتمانی کورد لەنێو گڕ و بڵێسەی ئاگردا دەسووتان، ئا لەو کاتە هەستیارەدا، لەگەڵ وەرزی کڕێوە و سەهۆڵبەندان، لەو کاتەدا کە زوڵم و زۆری شاکان گەرووی ئازادی دەخنکان، لەو ساتەوەختەدا کە سمکۆی شەهید غەڵتانی خوێن کرابوو، شۆڕشی ئارارات سەرکوت کرابوو، لە دێرسیم سەید ڕەزا لەدار درابوو. لەو دەمەیدا کە بیری ئازادیخوازی بڤە و لە هەر گۆشەیەک داری سێدارە هەڵخرابوو، لەنێو تەمتومان و گڕی ئاگری شەڕی گەردوون و شاکاندا، بلیممەتێک بوو بە دەنگی کپکراوی گەلێکی بندەستی ڕۆژهەڵاتی نێوەراست و حیزبێک بوو بە پێشەنگی بیری کوردایەتی و سەربەخۆیی و چوارچرا هەموو کوردستانی کردە چرا. لەنێو بەفر و سەهۆڵدا گوڵی هیوا ڕوا، کوردانی هەر چوار پارچەی نیشتمان چاوی ئومێدیان بڕییە دەوڵەتی کوردستان. زستان بوو بە بەهار و بەهارستان. سروشت فەڕشی سپیی بۆ پێشوازیی پێشەوای کوردان ڕاخست هەتا دەنگی کورد بەگوێی کەڕی مێژوو و پەیمانە شوومەکەی سایکس‌پیکۆدا بدا و پیلان و سنوور و کەوشەنی چاڵدێران و سەفەوی و عوسمانی لەسەر نەخشەی جیهان بسڕێتەوە.
لە ساڵی ١٣٢٤ی هەتاوییدا، هەتاو لەسەر دوند و چیاکانی کوردستان بوو بە هیوای ڕۆژێکی نوێ. ئا لەو کاتەدا مەهاباد بو بە قیبلەی ئۆگرانی ئازادی و، ئازادیخوازان پۆل پۆل بوونە میوانی ماڵە گەورەکەی کوردان. کۆمار بێ جیاوازی هی هەموان بوو، لەشکری بارزان و موکریان هەتا باکوور و باشووری ڕۆژهەڵاتی نیشتمانم، کرێکار و جووتیار، فەقێ و مامۆستا و خوێندکار، دەست لە نێو دەست بوونە بنیاتنەری یەکەمین دەوڵەتی کوردان. ژن و مێر، لاوانی چەلەنگ و میرخاس، شۆڕەسوار و سوارچاک و چەک لەشان، خامە بەدەست و نووسەر، بۆ پارێزگاری لە نیشتمانی کوردان بوونە قەڵغان و سپەر و سەنگەر. لەنێو خوێن و گڕ و دووکەڵ و دوودمانی جەنگێکی ماڵوێرانکەردا، لەگەڵ شەختە و بەفر و ڕێگەبەندان، کورد بوو بە خاوەن ئاڵا و پێشەوا و پێشمەرگە و کۆماری کوردستان. لە تاریکستان و قاقڕستانی ئازادیدا، لە ئێرانی شا و شازادەکاندا کوردستان بوو بە مەڵبەندی دێموکراسی و بیری ئازادی و ئازاد ژیان. کۆمار بوو بە پێناسە، پێشەوا بوو بە مەشخەڵداری بیری نەتەوەیی، بوو بە سەرۆک کۆمار، بوو بە پێشەنگ و پێشەوا و بوو بە سەرقافلەی کاراونێک کە بەنێو شەختە و تەلیسم و لەمپەر و نووکی سەرنێزەی داگیرکەردا هەنگاوی نا و بێ‌باک لە مردن لە زەبروزەنگی نەیار و دژمن و دژبەر نەپرینگایەوە و ئاڵای ئاڵ‌وواڵای ڕەنگاوڕەنگی کوردستانی لە چوارچرا کردە پیناسەی گەلێکی دابەشکراو و بەشخوراو.
“ئەی ڕەقیب” بوو بە دەنگی دلێری کورد، “خوایە وەتەن ئاوا کەی” بوو بە سروودی ئازادی و ئاوەدانی، هونەرمەند و هۆزانڤان و هۆزانبێژ بە هۆرە و لاوک و حەیران و هۆزانەوە گۆڤەندی ئەوینی کۆماریان ڕازاندەوە و هێمن و هەژار و هەڵبەستوان قەسیدەی هیوای نیشتمانیان نووسیەوە.
ئەو مێژوەی باب و پاپیرانمان لە سەنگەری بەرگریدا بە بەرخۆدان و خوێن نووسیبوویاننەوە، وەچە و نەوەکانی دوای ئەوان لە مەکتەبەکەی قازی‌دا بە شانازییەوە خوێندیان و خوێندیانەوە. ئەو ڕۆژە لەژێر ئاڵای کوردستاندا زارۆک و زمان گەشانەوە، پێنووس و پەرتووک و پەڕاو لە ژوانی ئەشقی نیشتماندا تلانەوە، وانە و ئەلفوبێی کوردی لەسەر تەختەی ڕەشەی مێژوو بە زمانی شیرینی کوردی، بە زمانی دایک نووسرانەوە.
لەو ڕۆژەدا کورد بە سەرباز و سەرکردەوە، بە وەزیر و ژنراڵەوە بوونە خزمەتکاری میللەتی خۆیان و دەوڵەت و میللەت دەستەملانی یەک بوون، بەندیخانەکان بوونە فێرگە و، خوێندنگە ئاوەدان و شەقام و شار شادیان لە دڵ گەڕا، سروشت دوند و گوندی نیشتمانی لەئامیز گرت و لە ڕێبەنداندا جاڕی بەهاری کوردی دا.
گەرچی دیکتاتۆر لە زایەڵەی دەنگی ئازادی خەو لە چاوانی زڕا و چاوی بە ئاڵای کوردان هەڵنەهات و کۆمار کەوتە بەر شاڵاوی لەشکر و قشوونی تاڵان و، و پێشەوای کوردان بە سەربەرزییەوە لە سێدارە درا، بەڵام کۆمار و کورد نەمردن، ئامانجەکانی کۆمار و پێشەوا بوونە مەشخەڵی ڕێگەی ڕزگاری و سروودی ئەی ڕەقیب و تۆڵە و ڕقی پیرۆز ئاوێتەی یەک بوون و لە شار و گوند و کەژ و چیای ئەم نیشتمانە تا ئەمڕۆش سروودی سەروەری و سەربەخۆیی هەروا دەنگ دەداتەوە.
وەک دەبینین ئەمڕۆ لە هەموو بەشەکانی نیشتمانم هیوا و ئاواتەکانی کۆمار هەر لە برەو و بەردەوامی دان و ئاڵای خەبات هەر لە شەکانەوەدایە. ئێمەش بە ئومێدەوە ئەم ڕێگەیە دەپێوین. ڕێگەی پێشەوا ڕێگامانە و ڕاسپاردەکانی کۆمار ئامانجمانن. بە شانازییەوە دەتوانم بڵێم بیری نەتەوەیی و دەوڵەتی کوردی، پێشەوا و کۆمار، پێشمەرگە و ئاڵا، سەروەرییەکانی حیزبی دێموکراتی کوردستانن.
