لەماوەی ١٥ ڕۆژی سەرەتای ساڵی نوێی زایینیدا هێزەکانی ئەرتەشی تورکیە لە ڕۆژاوای کوردستان زیاتر لە ٢٥٥ هێرشیان کردووەتە سەر شارەکان و خەڵکی ڕۆژاوا و بەو هۆیەوە کۆمەڵێک هاووڵاتیی مەدەنی شەهید و بریندار بوون.
بەپیی هەواڵی هەواڵدەرییەکانی ڕۆژاوای کوردستان، لەماوەی ١٥ ڕۆژی سەرەتای ساڵی نوێی زاییندا هێزەکانی ئەرتەشی تورکیە لە ڕۆژاوای کوردستان زیاتر لە ٢٥٥ جار هێرشیان کردووەتە شارەکان و خەڵکی ڕۆژاوای کوردستان؛ لەم پێوەندییەدا هێزەكانی سوریەی دێموكرات (هەسەدە)، وێڕای پشتڕاستکردنەوەی ئەو هەواڵە ڕایگەیاندووە کە: “ئەرتەشی توركیە و گرووپە میلیشیاکانی سەر بە تورکیە، لە ١٥ ڕۆژی سەرەتای ساڵی ٢٠٢٢ی زایینیدا زیاتر لە ٢٥٥ جار هێرشی کردووەتە سەر ناوچەکانی منبج، کۆبانێ، عەین‌عیسا، تەل‌تەمر، رێگەی ئێم٤، دربێسی و دەوڵەتی توركیە بۆ ئەوەی ڕەوایی بە هێرشەکانی بدات، پڕوپاگەندای ئەوە دەکات کە گوایە ژمارەیەکی زۆر شەڕڤانانی هەسەدەی شەهید کردووە، بەڵام بە پێچەوانەوە لە هەموو هێرشەکاندا هاوڵاتیانی مەدەنیی کراونەتە ئامانج.”
بەپێی زانیارییەکان؛ لە هێرشەکانی تورکیە کە بە چەکی قورس وەک تۆپ و خۆمپارە بۆسەر خەڵکی ڕۆژاوای کوردستان، دوو هاووڵاتیی مەدەنیی شەهید بوون و ٥٨ هاووڵاتیش بریندار بوون.
