یەزدان میرزایی وەرزشوانی بواری وشۆ و خەڵکی ئیلام بە تۆمەتی پێوەندیدار بە ماددە هۆشبەرەکان لەلایەن دادگای سزاکانی زاهیدان بە ئێعدام مەحکووم کرا.
یەزدان میرزایی سەرەتایی ٢٠٢٠ی زاینیی، لە زاهیدان لە فڕۆکەخانەی ئەم شارە دەسبەسەر و بە تۆمەتی بازرگانی بە مادەی هۆشبەر لەلایەن ئیدارەی ئیتلاعاتی زاهیدانەوە بۆ گرتووخانەی ئەو ئیدارەیە ڕاگوازرا.
شیاوی باسە کە ناوبراو ٢٥ ڕۆژ لە گرتووخانەی ئیتلاعات دەسبەسەر بووە.
یەزدان میرزایی لە ماوەی دەسبەسەربوونی و لە دادگایش ئەو تۆمەتەی بەرپەرچ داوەتەوە.
یەزدان میرزایی ٢٧ ساڵە، وەرزشوانی بواری وشۆ و خەڵکی ئیلام، ئەندامی تیمی نەتەوەیی لە ستایلی ساندایە. ناوبراو خاوەنی میدالیای زێری کێبەرکێی ئاسیا و خەڵاتی زێڕی کێبەرکێی نێونەتەوەییە.
جێی ئاماژەیە کۆماری ئیسلامی ئەو وەرزشوانە سەرکەوتووانە کە لەگەڵ خۆی نابن بە شێوەیەک دەریاندەپەڕێنێ یان دەیانکوژێت، هەر لەم ڕۆژانەدا هاووڵاتییەکی کوردی دیکە خەڵکی یاسووج بە ناوی کامران بەزرکار لەلایەن ڕێژیمەوە بەبێ هیچ هۆکارێک لە زینداندا کوژرا.
