ئیلام بە یەکێک لە دەوڵەمەندترین پارێزگاکانی کوردستان و ئێران ئەژمار دەکرێت و هاوکات ڕێژەی هەژاری و بێکاریی خەڵکی لەو پارێزگایە لە پلەی یەکەمەکانی ئامارەکاندایە.
ڕۆژی یەک‌شەممە، ١٩ی بەفرانباری ١٤٠٠ی هەتاوی، گۆڤاری ڕەخنەی ئەندێشەیی کە بنکەی سەرەکی لە شاری کرماشانە، لە لاپەڕەی تۆڕە کۆمەڵایەتییەکانی خۆی و لە پۆستێکی ڕەخنەییدا لەژێر ناوی “بێ‌سەروبەری ئابووری”، وێڕای ئاماژەدان بە ئامارە چەواشەکارانەکانی ناوەندی ئاماری ڕێژیمی ئێران لەسەر ڕێژەی هەژاری و بێکاریی ئەو پارێزگایە، نووسیویەتی: بەپێی ئەو ڕێژەیەی کە شوکروڵا شێرخانی، بەرپرسی ناوەندی ئاماری ئێران ڕایگەیاندووە، ڕێژەی بێکاری لە ئیلام ١٠ هەزار و چوارسەد کەسە، بەڵام پارێزگاری ئیلام ڕێژەی بێکاری، زیاتر لە ٢٤ هەزار کەس ڕاگەیاندووە.
بەپێی قسەکانی پارێزگاری ئیلام، ٢٤ لەسەدی خەڵکی ئیلام بێکارن؛ بەڵام لە ڕاستیدا و بەپێی لێدوانەکانی خەڵکی خۆجێیی پارێزگای ئیلام زیاتر لە ٤٥ لەسەدی خەڵک بێکارن.
لە بەشێکی تری ڕەخنەکانی ئەو گۆڤارەدا هاتووە: وێڕای ئەو کانگا پیشەسازییانەی کە گرێدراوی نەوت و گازن و سەرچاوەکانی تر، زیاتر ١١ لەسەدی سەرچاوەی گازی و زیاتر ٧ لەسەد سەرچاوەی نەوتیی ولاتی ئێران لە پاڕێزگای ئیلامە، ئێستە پرسیارەکە ئەوەیە؛ ئایا ئیلام لە کوێی هاوکێشە ئابوورییەکاندایە.
لە بەشی کۆتاییی ڕەخنەکەشدا ئاماژە بە کۆمەڵێک سەرچاوەی تری داهاتی پارێزگای ئیلام کراوە و کۆمەڵیک پرسیار ڕوو بۆ ڕای گشتیی خەڵک ورووژێندراوە و نووسراوە؛ ئایا پرسی ئابووری لە ئیلام تەنیا گاز و نەوتە؟ ئەی کشتوکاڵ و پیشەسازییەکانی تر جێگەیان هەیە؟ دەرفەتی سنووریی پارێزگا بۆچی نەیتوانیوە ئەو پارێزگایە لە پارێزگایەکی بێ‌بەرهەم ڕزگار بکات و بیکاتە پارێزگایەکی گەشەکردووە؟
