وتەبێژی وەزارەتی بەرگریی ئەمریکا دەڵێ: ئێمە بەردەوام نیگەرانی هێرش بۆسەر هێزەکانمانین لە عێراق و سووریە لەلایەن گرووپە میلیشیاکانی سەر بە رێژیمی ئێرانەوە و ئەم نیگەرانییەی ئێمە شتێکی نوێ نییە.
جان کێربی، وتەبێژی وەزارەتی بەرگریی ئەمریکا، ڕۆژی چوارشەممە ١٥ی بەفرانباری ١٤٠٠ی هەتاوی، لە کۆنفرانسێکی ڕۆژنامەوانیدا، سەرەڕای ئاماژە بە هێرش بۆسەر بنکە سەربازییەکانی ئەمریکا لە عێراق و سووریە، وتی: ناتوانین بە دڵنیایی زۆرەوە بڵێین کە ئەو هێرشانە لەلایەن چ گرووپێکەوە کراوەتە سەر بنکە سەربازییەکانمان، بەڵام ئەوەی کە ڕوون و ئاشکرایە ئەویە کە ئەو هێرشەگەلە هاوشێوەی هێرشەکانی میلیشیاکانی سەر بە ڕێژیمی ئێرانە و هێزەکانی ئێمە لە عێراق و سووریە مافی بەرگریکردن لە خۆیان هەیە و ئێمە ئەو هەڕەشانە بە جیددی وەردەگرین.
ناوبراو لە درێژەدا بە ئاماژە بە ڕێککەوتنی نێوان ئەمریکا وعێراق لەهەمبەر هاتنەدەرەوەی هێزەکانی ئەمریکا و هاوپەیمانان لە عێراق، وتی: ئێمە خەریکی جێبەجێکردنی پلانێکین بۆ هێنانەدەرەوەی هێزەکانمان لە عێراق، بەڵام ئاگامان لە هێرشی میلیشیاکانی سەر بە ڕێژیمی ئێران بۆسەر بنکە و بارەگاکانمان دەبێ و ئیزن نادەین کە هیزەکانمان لەلایەن هیچ کەسێکەوە ڕووبەڕووی مەترسی ببنەوە.
