لەهەمبەر داواکاریی هێزی پێشمەرگەی هەرێمی کوردستان بۆ دابینکردنی فڕۆکەی بێفڕۆکەوان، ئەمریکا ڕەزامەندی نیشان داوە و لە بەرانبەردا حکومەتی ناوەندیی عێراق ناڕەزایەتیی دەربڕیوە.
وەزارەتی پێشمەرگەی حکومەتی هەرێمی کوردستان لەسەر وەرگرتنی فڕۆکەی بێفڕۆکەوان، داواکارییەکی پێشکەش بە هاوپەیمانیی نێودەوڵەتی کردووە و لەو داواکارییەدا ئاماژەی بەوە داوە کە هێزی پێشمەرگەی کوردستان پێویستی بە فڕۆکەی بێفڕۆکەوانی چاوەدێرییە، تاکوو بتوانن بە بەردەوامی چاوەدێریی ئەو ناوچانە بکەن کە تێرۆریستانی داعشی لێیە و جموجوولەکانی ئەو گرووپە تێرۆریستییە بە ئاسانی کۆنتڕۆڵ بکەن.
سەرەڕای ئەوەی کە ئەمریکا لەم پێوەندییەدا ڕەزامەندی دەربڕیوە کە فڕۆکەی بێفڕۆکەوان بدرێت بە یەکەی یەکگرتووی هێزەکانی وەزارەتی پێشمەرگەی هەرێمی کوردستان، بەڵام تاکوو ئێستا حکومەتی ناوەندیی عێراق ڕەزامەندی دەرنەبڕیوە و بەم هۆکارەشەوە هێشتا دڕۆنەکان نەگەیشتوونەتە دەستی هێزەکانی پێشمەرگە.
جەبار یاوەر، ئەمینداری وەزارەتی پێشمەرگەی هەرێمی کوردستان لەم پێوەندییەدا بە تۆڕی میدیایی ڕووداوی ڕاگەیاندووە: “ئەوەندەی ئێمە زانیومانە، ئەمریکا ڕەزامەندیی داوە کە فڕۆکەی بێفڕۆکەوانی چاوەدێری بۆ هێزەکانی پێشمەرگە دابین بکرێت، بەڵام لەلایەن حکومەتی ناوەندیی عێراقەوە ڕەزامەندی نەدراوە و کێشەی دواکەوتنی دابینکردنی ئەو فڕۆکە بێفڕۆکەوانانەیش تاکوو ئێستە هەر ئەوەیە.”
بە وتەی ئەمینداری گشتیی هێزەکانی پێشمەرگەی کوردستان، ئێستا لەلایەن هاوپەیمانان، ئەمریکا و وەزارەتی پێشمەرگەوە هەوڵێک هەیە کە وەزارەتی بەرگریی عێراق و فەرماندەیی ئۆپەراسیۆنە هاوبەشەکان ڕەزامەندیی بدەن ئەو فڕۆکە بێفڕۆکەوانانە بە هێزەکانی پێشمەرگە بدرێن.
