لە ڕۆژانی دووشەممە ٢٠ی دێسامبر و چوارشەممە ٢٢ ی دێسامبری ٢٠٢١ی زایینی، دوایین ڕۆژەکانی دانیشتنەکانی ٥٤ و ٥٥ ی دادگای “حەمید نووری”ی جینایەتکار لە دادگای ناوەندیی ستۆکهۆڵم پێتەختی وڵاتی سوئێد، بەڕێوە چوون.
لە ڕۆژی دووشەممەدا، شاهیدی ئامادەبوو “حوسێن مەلەکی” بوو.
ناوبراو کە ئەندامی گرووپی “فورقان” بووە، لە ڕۆژی ٥ی ڕەزبەری ساڵی ۱۳٥۹ی هەتاوی لە یەکێک لە شەقامەکانی تاران بەشێوەی ڕەشبگیری، دەگیرێ.
دوای ١١ ساڵ بەندکران لە گرتووخانەکانی ئێڤین، قزڵ‌حەسار و گەوهەردەشت، ئازاد دەکرێ و ناوبراو ئێستا لە وڵاتی سوئیس نیشتەجێیە و یەکێک لەو شاهیدانە بوو کە باسی هەڵسوکەوتەکانی نامرۆڤانەی زیندانڤانەکان و ئەشکەنجە و ئازارەکانی ناو بەندیخانەی کرد لەو پەیوەندییەدا زانیاریی زۆری خستە ڕوو.
لە ڕۆژی چوارشەممە ٢٢ی دێسامبر و لە دوایین ڕۆژی دادگادا، “مێهرداد نەشاتی مەلەکیان” شاهیدێکی دیکە بەدژی جینایەتکاران و جەلادەکانی گرتووخانەکانی ئێڤین، قزڵ‌حەسار و گەوهەردەشت شاهیدی دا و قسەی کرد. ناوبراو ئەرمەنی و بە تاوانی لایەنگری لە ڕێکخراوی چریکە فیداییەکانی گەل – (اقلیت)، گیرابوو.
مەلیکیان، کە لە مانگی ڕەزبەری ١٣٦١ ی هەتاوی گیراوە؛ ناوبراو لە دادگایەکی ١٠ خولەکیدا، پتر بە تاوانی ئەرمەنی بوون و پێکهێنانی ژیانی هاوبەش لەگەڵ کچە موسڵمانێک لێپێچینەوەی لەگەڵ کرا بوو و پێنج ساڵ زیندانی بەسەردا سەپێندرابوو.
هەروەها بەڕێز “نیشاتی”، وەک هەموو شاهیدکانی دیکە، باسی لە گواستنەوەی ژمارەیەکی چەند سەد کەسی زیندانییان لە زیندانی ئێڤین بۆ زیندانی گەوهەردەشت کرد و ئاماژەی بە داڵانی لێدان و لێدانی بە قامچی، کابڵ، شیلانگ، قوڵەدار، قایشی کەمەر، شەپ و زلە، دەمپایی، جێنودان و قسەی نەشیاو و سووکایەتی کرد.
باسی لەوەش کرد کە بۆ لای “هەیئەتی مەرگ” بردراوە کە لە “ئیبراهیمی ڕەئیسی، پوور محەممەدی، نەییریی و ئیشراقی پێک هاتبوون؛ هەروەها ئاشکراشی کرد کە “نەییریی و ئیشراقی” سەرەڕای زیندووکردنەوەی چۆنیەتیی پێکهێنانی ژیانی هاوبەشی ئەرمەنییەک، لەگەڵ موسڵمانێک، پێداگرییان لەسەر ئەوە کردووەتەوە کە دەبێ بەزۆر نوێژ بکات؛ ناوبراو دوای پتر لە ٨ ساڵ زیندان، ئازاد کراوە.
لەو دوو ڕۆژەدا جگە لە هۆڵی دادگای “حەمید نووری”، لە دەرەوەش و لە ڕووبەڕووی بینای دادگا، ژمارەیەک زۆر لە بەرپرسان و ئەندامانی حیزبی دێمۆکراتی کوردستان- کۆمیتەی سوئێد و دۆستانیان کۆ ببوونەوە. هاوڕێیانی حیزبی ئاڵای کوردستان، وێنەی شەهیدی نوێی خەباتی ڕزگاریخوازیی گەلی کورد “حەیدەر قوربانی” و پۆلێک لە شەهیدانی ١٣٦٧ی هەتاوییان هەڵگرتبوو کە لە زیندانی “گەوهەردەشت” بوون و ئێعدامیان بەسەردا سەپابوو و هەروەها وێنەی پۆلێک کە لە کوردستان و بە تایبەتی لە دیزل ئاباد، گیانیان لێ ئەستێندرابوو.
هاوکات دروشمی لەقاودانی درۆکانی “نووری” جەلاد بە زمانەکانی کوردی، فارسی، ئینگلیسی و سوئێدی، ئارمی حیزب و یەکیەتیی ژنانی دێموکراتی کوردستانیان بەدەستەوە بوو و ژمارەیەکیشیان بە جلوبەرگی کوردییەوە بەشدار بوون.
شایانی باسە کە تێکۆشەرانی کورد کاناڵ رێپۆرتاژێکیان لەو کۆبوونەوە ئامادە کرد کە تێێدا، چوار زیندانی سیاسی دەیەی ٦٠ سەبارەت بە دادگایی “حەمید نووری” قسەیان کرد.
هەروەها، بەشی کوردیی ڕادیۆ “زایەڵە”، دیمانەیەکی کورتی لەگەڵ بەڕێز حەسەن حاتەمی نوێنەری کۆمیتەی دەرەوەی وڵاتی حیزبی دێموکراتی کوردستان بۆ دانیشتنەکانی دادگای حەمید نووری (عەبباسی) پێکهێنا.
