لە درێژەی کار و چالاکیی تەبلیغیی بەبۆنەی ۲٦ی سەرماوەز، ڕۆژی ئاڵا و پێشمەرگەی کوردستان، ئەندامان و لایەنگرانی حیزبی دێموکرات لە شارەکانی مەهاباد، بانە و ناوچەی لەیلاخ بە شێوەیەکی بەرفراوان چالاکیی تەبلیغییان بەڕیوە برد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی ٢٦ی سەرماوەز، ئەندامان و لایەنگرانی حیزبی دێموکراتی کوردستان بەبۆنەی ڕۆژی ئاڵا و پێشمەرگەی کوردستان، لە شاری مەهاباد لە گەڕەکەکانی “کەمەربەندی، زەمینهای شارەداری، فەجر، جەهاد و سەیداوا” دروشم و تراکت و وێنەی پێوەندیدار بەو ڕۆژەیان بڵاو کردەوە و یادی ڕۆژی ئاڵا و پێشمەرگەیان بەرز ڕاگرت.
هەروەها دڵسۆزانی دێموکرات لە شاری بانە بۆ چەندمین جار لە گوندەکانی “کانی‌بەرد، سیاومە، میراواێی سەروو و میراواێی خواروو، سوێروێ و دووڕێیانی شەیدیلە و دووڕێیانی زەرواوی خواروو”، دروشم و تراکتی حیزبییان بڵاو کردۆتەوە و لەگەڵ ڕێبوارانی ڕێگای شەهیدانی دێموکرات پەیمانی وەفادارییان نوێ کردەوە.
لە درێژەی ئەو کار و چالاکییانەدا کە لە هەموو شار و ناوچەکانی کوردستان بە شێوەیەکی بەربڵاو بەڕێوە چووە، ئەویندارانی ڕێبازی دێمـوکرات لە بەڕێوەچوونی چالاکیی تەبلیغی بەبۆنەی رۆژی ٢٦ی سەرماوەز لە ئاوایی سەراوشارک لە ناوچەی لەیلاخ، ڕۆژی ئاڵا و پێشمەرگەیان بەرز ڕاگرت و ئەو ڕۆژەیان لە پێشمەرگە پیرۆز کرد و وەفاداری خۆیان بەو ڕێبازە پیرۆزە نیشاندا.
ڕۆڵە چاونەترسەکانی ڕێبازی پیرۆزی حیزبی دێموکراتی کوردستان لەو شارانە سەرەڕای هەڕەشەی هێزە سەرکوتکەرەکانی ڕێژیم، بەبۆنەی ڕۆژی پێشمەرگە و ئاڵای کوردستان بە چالاکیی تەبلیغیی ئەو ڕۆژەیان لە هێزی پێشمەرگەی کوردستان پیرۆز کرد و بەلێنیان دووپات کردەوە تا کاتی ئازادی و سەربەستیی کوردستان، وێڕای پێشمەرگە لە سەنگەرێکدا بەدژی داگیرکەران لە خەبات و تێکۆشان بەردەوام بن.
