هەڵمەتی زاگرۆسانە، لە شار و ناوچە و گوندەکانی ڕۆژهەڵاتی کوردستان بە مەبەستی بووژاندنەوەی ژینگەی نیشتمان و سەرسەوزڕاگرتنی زاگرۆس درێژەی هەیە.
خەڵکی ڕۆژهەڵاتی کوردستان بۆ بووژاندنەوەی ژینگەی کوردستان و سەرسەوزڕاگرتنی زاگرۆس، بە دروشمی “ئەم نیشتمانە بە باڵای زاگرۆسەوە جوانە” درێژە بە هەڵمەتی زاگرۆسانە دەدەن و لە چالاکییەکانیان بۆ پارێزگاری لە ژینگەی زاگرۆس و ئاوەدانیی زیاتری نیشتمان، بەردەوامن.
لە درێژەی ئەو چالاکییانە و لە ڕۆژانی ڕابردوودا، دڵسۆزانی ژینگەی کوردستان و ئەندامانی ئەنجومەنی “یارانی سەوزپۆش”ی شاری “دەڕەشار”ی پارێزگای ئیلام، ئەندامانی ئەنجومەنی “خۆبەڕێوەبەریی ئەلیاسیـ”ـی ناوچەی ئەلیاسی لەنێوان شارەکانی سەرپێڵ زەهاو و داڵاهۆ، ئەندامانی ئەنجومەنی “سەوڵی سەوزی داڵاهۆ” و هەروەها ئەندامانی ئەنجومەنی “ژینگەپارێزیی چرۆی ژیان”ی کرماشان، لە چەندین چالاکیی جیاواز و لە ناوچە جیاوازەکانی ئەو شارانەدا بە چاندنی بەڕوو، ئەرغەوان، قەزوان، گوڵ و گیا و دارەکانی تری لە هەڵمەتەکەدا بەشدارییان کردووە.
لەم پێوەندییەدا ئەنجومەنی “خۆبەڕێوەبەریی ئەلیاسی” ڕیاگەیاندووە کە بە یادی شەهیدانی ژینگەپارێزی کوردستان، سەریف باجوەر، ئومید کۆنەپۆشی، موختار خەندانی، یاسین کەریمی، بیلال ئەمینی و سەرجەم شەهیدانی تر، بەڕوویان چاندووە.
لە شار جوانڕۆ، کۆمیتەی منداڵانی ئەنجومەنی ژینگەپارێزیی “سەوزی ماپریس” و ئەندامانی تری ئەو ئەنجومەنە بە هاوکاریی گرووپە شاخەوانییەکان و چالاکانی ژینگەپارێزیی ئەو شارە و ناوچەکانی دەوروبەری، لە شاری پاوە ئەندامانی ژینگەپارێزیی “ژیوای” بە هاوکاریی شاخەوانانی پاوە، لە ناوچەکانی هەورامانی تەخت و لهۆن و ژاوەرۆ لە چەندین چالاکیی بەرین و جیاوازدا لە شاخ و کێوەکانی ئەو شار و ناوچانە و بەتایبەت لە شاخی کۆساڵاندا بە چاندنی بەڕوو، ئەرغەوان، قەزوان، دار و گوڵ و گیاکانی تر لە هەڵمەتی زاگرۆسانەیان بەڕێوە بردووە.
لە ناوچەی لەیلاخ و شاری دێولان، شارەدێی گردمیانی سەر بە شاری دێولان، لە شاری مەریوان و لە گوندەکانی ناوچەی کەڵاتەرزان و بەتایبەت ئاواییی “جانەوەرە”، لە چەندین چالاکیی جیاوازدا بە چاندنی بەڕوو، قەزوان، ئەرغەوان و گوڵ و گیا و دارەکانی تر بەشدارییان لە هەڵمەتەکەدا کردووە و هەر لەم پێوەندییەدا ئەنجومەنی “سەوزی چیای مەریوان” لە چالاکییەکی جیاواز و بە هاوکاریی قوتابییانی قوتابخانەی سەرەتاییی “تەزکییە”ی مەریوان، بە باسێکی خاتوو “بەیان ئەحمەدی” ئەندامی ئەو ئەنجومەنە لەسەر گرنگیی ژینگە و بەتایبەت دارستان و هەروەها چۆنیەتی دانانی دنکەبەڕوو، لە دەوروبەری گولی زرێبار هەڵمەتەکەیان بەڕیوە برد.
هەروەها ئەندامانی ئەنجومەنی “ژینگەپارێزانی ژیاری سەوزی سەقز”، گرووپی شاخەوانیی ئەنجومەنی ژینگەپارێزیی “پاژینی بانە” و گرووپی ئافرەتانی “ئاگرین”ی بانە، لە چەندین چالاکیی جیاواز و لە ناوچەکانی ئەو دوو شارە و بە بەشداریی مندالان و قوتابییانی بەشیک لە قوتابخانەکانی ئەو دوو شارە، بە چاندنی داربەڕوو، ئەرغەوان، گوڵ و گیا و دارەکانی تر هەڵمەتی زاگرۆسانەیان بەڕیوە برد.
