تێکۆشەرانی حیزبی دێموکراتی کوردستان لە گوندەکانی ناوچەی هەوشار بەبۆنەی ٢٦ی سەرماوەز ڕۆژی ئاڵا و پێشمەرگەی کوردستان، بە بڵاوکردنەوەی دروشم و وێنەی پێشمەرگە چالاکیی تەبلیغییان بەڕێوە برد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی سێشەممە ٢٣ی سەرماوەزی ١٤٠٠ی هەتاوی، ڕۆڵە قارەمانەکانی حیزبی دێموکراتی کوردستان لە گوندەکانی قۆزڵوو، گۆزەبڵاخ، کارێز، تورکە یارە، حەسار، باخچەمەشە، حەسەنلوو، سەفاخانە، باخی سەرێ و باخی خوارێ، قەرە، گەڕاو، ساینجووت لە ناوچەی هەوشار بە بڵاوکردنەوەی تراکت و دروشمەکانی تایبەت بە ڕۆژی ئاڵا و پێشمەرگەی کوردستان و چەسپاندنیان بە تابلۆکانی سەر ڕێگای ئاواییەکانی ئەو ناوچەیە ڕێزیان لە پیرۆزیی ئاڵای کوردستان و مێژووی پڕ لە شانازیی هێزی پێشمەرگەی کوردستان گرت.
شۆڕشگێڕانی ناوچەی هەوشار سەرەڕای بەربەستی هێزە سەرکوتکەرەکانی کۆماری ئیسلامیی ئێران، هەمیشە ڕۆژە مێژوویی و پیرۆزەکانی نەتەوەی خۆیان بەلاوە پیرۆز بووە و بێ گوێیان بە هەڕەشەکانی ڕێژیمی ئێران و لە یادی ٢٦ی سەرماوەزدا بەڵینیان لەگەڵ پێشمەرگە دووپات کردەوە کە تا ئازادی لە سەنگەری پێشمەرگەدا خەبات دەکەن.
