ناوەندی مەدەنیی کافەکتێبی ئەندێشەی پیرانشار لەلایەن ئیدارەی ئیتلاعاتی پیرانشارەوە داخرا.
دوای دەسبەسەرکرانی سێ کەس لە بەڕێوەبەرانی ڕێکخراوی مەدەنیی کافەکتێبی ئەندێشەی پیرانشار، بە ناوەکانی “خەبات خەتیاڵ”، “جەهانگیر ساغەرنیا” و “میلاد هاتێف”، لە ڕێکەوتی ۲۶ی خەزەڵوەردا، ڕۆژی دووشەممە ڕێکەوتی ۲۲ی سەرماوەزی ۲۷۲۱، کافەکتێبی ئەندێشەی پیرانشار بە فەرمی لەلایەن ئیدارەی ئیتلاعاتی ڕێژیمەوە داخرا.
شایەنی باسە ڕێکەوتی ۲۶ی خەزەڵوەری مانگی ڕابردوو، هێزەکانی ئیدارەی ئیتلاعات بە شێوەیەکی دڕندانە هێرشیان کردە سەر کافەکتێبی ئەندێشە و دوای لێدان و ئەزییەت و ئازاری بەڕێوەبەران، هەڵکێشانی چەک و هەڕەشە لە بەڕێوەبەران و هەروەتر شێواندن و تێکدانی ئەو شوێنە، وێڕای دەسبەسەرکردنی سێ کەس لە بەڕێوەبەران، دەستیان بەسەر لەپتاپ، موبایل، دوو ماشێن و ژمارەیەکی بەرچاو لە کتێب و کەلوپەلی ئەو ناوەنددا گرتووە؛ رۆژی دواتر واتە ڕێکەوتی ۲۷ی خەزەڵوەر، هێزەکانی ئیتلاعات هێرشیان کردووەتە سەر ماڵی “جەهانگیر ساغەرنیا” و دەستیان بەسەر لەپتاپ و موبایلی ئەندامانی بنەماڵەکەی داگرتووە.
دوو کەس لە گیراوان بە ناوەکانی “جەهانگیر ساغەرنیا” و “خەبات خەتیاڵ” دوای تیپەڕ بوونی ٥ ڕۆژ لە دەسبەسەرکران، هەر یەک بە بارمتەی ٢٠٠ میلیۆنی و بە شێوەی کاتیی تا بەڕێوەچوونی دادگایی ئازاد کراون.
ڕێکخراوەی مەدەنیی کافەکتێبی ئەندێشەی پیرانشار، ساڵی ۱۳۹۵ی هەتاوی دامەزراوە و لەماوەی ڕابردوودا یەکێک لە دیارترین ناوەندە ڕوناکبیری و مەدەنییەکانی ڕۆژهەڵاتی کوردستان بووە و بە بەڕێوەبردنی چەندین سێمینار و پانێلی زانستیی جۆراوجۆر، کۆڕی پەردەلادانی کتێب، شانۆ و پێشانگای هونەری، فرۆشی کتێب و ڕێکخستن و بەشداریی لە کەمپەینەکانی بوومەلەرزەی کرماشان، کۆتۆل و … سەکۆیەکی بەرچاو و کاریگەریی مەدەنی بووە بۆ پەرەپێدان و گەشەکردنی ڕووناکبیری و هزری نەتەوەیی لەناوخۆی وڵات دا، هەر بەم هۆیەشەوە بەردەوام لەژێر زەخت و گوشاری هێزەکانی وەزارەتی ئیتلاعات دابووە و لە ئاکامدا بڕیاری داخرانی دەرکراوە.
