لە گوند و ناوچەکانی سەردەشت و پیرانشار بەبۆنەی هاتنی ٢٦ی سەرماوەز ڕۆژی پێشمەرگە و ئاڵای کوردستان، ئەندامان و ئەویندارانی پێشمەرگە و نیشتمان، چالاکیی تەبلیغییان بەڕێوە برد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی یەکشەممە ٢١ی سەرماوەزی ١٤٠٠ی هەتاوی، ئەندامانی دڵسۆزی حیزبی دێموکراتی کوردستان لە ناوچە و گوندەکانی شارەکانی سەردەشت و پیرانشار وەکوو “بادین‌ئاوێی پیران، کانی ئەشکەوت، گرد شەیتان، بێ‌کۆس، باولێ، دووچۆمان و کانی شینکە” لەسەر ڕێگای سەردەشت بۆ پیرانشار بۆ پێشوازی لە ٢٦ی سەرماوەز ڕۆژی پێشمەرگە و ئاڵای کوردستان، بە بڵاوکردنەوەی دروشمی تایبەت بە ڕۆژی پێشمەرگە و ئاڵای کوردستان، یادی ئەو ڕۆژەیان بەرز و پیرۆز نرخاند.
لاوانی ئەوینداری ئازادی لە کاتێکدا یادی ٢٦ی سەرماوەزیان کردووەتەوە کە هێزە داگیرکەرەکانی سپای تێرۆریستی پاسداران لە ناوچەکەدا بە مەبەستی سەرکوتکردنی لاوانی کوردستان بڵاوەیان پێ کراوە، بەڵام خەڵکی کوردپەروەری ئەو ناوچەیە بێ گوێدان بە هەڕەشەکانی سپای پاسداران، بە چالاکییەکانیان ٢٦ی سەرماوەزیان لە پێشمەرگە پیرۆز کرد.
