دووڕوویی کاربەدەستانی کۆماری ئیسلامیی ئێران سەبارەت بە جێبەجێکردنی ماددەی پانزەی یاسای بنەڕەتیی، جیا لە دژایەتیی نەتەوەکانی چوارچێوەی ئەو وڵاتە، ئاڵۆزیی لەنێوان مۆرەکانی ڕێژیمیشدا دروست کردووە.
سەرەڕای ئەوەی کە لە یاسای بنەڕەتیی ڕێژیم بۆ ئێران کە لە ڕاستیدا یاسای بنەڕەتیی ڕێژیمە نەک وڵاتی ئێران، لە ماددەی ١٥ی ئەو یاسایەدا خوێندن و پەرەوەردەکردن بە زمانی دایکیی نەتەوەکانی ئەو وڵاتە گونجێندراوە و بە شیوەیەکی یاساییش ڕێپێدراوە، بەڵام دوای تێپەڕبوونی زیاتر لە ٤ دەیە لە پەسەندکردنی ئەو یاسایە نەک تەنیا جێبەجێ نەکراوە، بەڵکوو زۆربەی خاڵ و بەند و ماددەکانی تری ئەو یاسایەش بە مەبەستی سیاسی لەلایەن ڕیژیمەوە پشتگوێ خراوە.
وێڕای بەردەوامیی ناڕەزایەتیی جۆراوجۆری نەتەوەکانی چوارچێوەی وڵاتی ئێران و بەتایبەت نەتەوەی کورد لە ڕۆژهەڵاتی کوردستان، لەسەر جێبەجێنەکردنی کۆمەڵێک لە ماددەکانی یاسای بنەڕەتیی ڕێژیم و بەتایبەت ماددەی ١٥، جاروباریش نوێنەرە دەستنیشانکراوەکانی ڕێژیم لە مەجلیس زۆر بە پارێزەوە باس لە جێبەجێکردنی ئەو ماددەیە دەکەن و لە ڕۆژانی ڕابردووشدا جارێکی تر ئەو باسە هاتووەتەوە ئاراوە و دیسان مەجلیسی ڕێژیم جێبەجێکردنی ماددەکەی پەسەند کردەوە، بەڵام لە سێناریۆیەکی بەرنامە بۆ داڕێژراودا، کۆمەڵێک لە مۆرە و نوێنەرە توندڕەوە دەستنیشانکراوەکانی مەجلیسی ڕێژیم دژایەتیی جێبەجێکردنی ئەو ماددەیە دەکەن.
لەم پێوەندییەدا “ئەحمەد نادری”، جێگری کۆمیسیۆنی “ئامووزش و تەحقیقات”ی مەجلیسی ڕێژیم، لە وتووێژێکدا لەگەڵ هەواڵدەریی “فارس”ی سپای تێرۆریستیی پاسداران، بە توندی دژایەتیی خۆی سەبارەت بە جێبەجێکردنی ماددەی ١٥ی یاسای بنەڕەتیی ڕێژیم دەربڕیوە و جێبەجێکردنی ئەو ماددەیە بە دژایەتیکردنی ئاسایشی نیشتمانی کە لە ڕاستیدا ئاسایشی ڕێژیمە دەزانێت و ڕایگەیاندووە کە سەرۆکی مەجلیس و بەرپرسانی ڕێژیم یاری بە ئاسایشی نیشتمانی دەکەن و کۆمەڵێک لە نوێنەرانیش بۆ ڕازیکردنی لایەنگرانی خۆیان جاروبار بەڵێنگەلێکی بێبنەما دەدەن کە تەنانەت خۆشیان باوەڕیان پێیان نییە.
سەرەڕای ئەوەی کە “عەلیڕەزا مۆنادی”، بەرپرسی کۆمیسیۆنی “ئامووزش و تەحقیقات”ی مەجلیسی ڕێژیم ڕایگەیاندووە کە مافی خوێندن و پەروەردەکردن بە زمانی دایکی لە زۆربەی کۆنڤانسیۆن و جاڕنامە جیهانییەکاندا هاتووە و ئەم گەڵاڵەیەش لە مەجلیسی ڕێژیم پەسەند کراوە، بەڵام جێگرەکەی بە توندی دژایەتیی جێبەجێکردنی ئەو ماددەیە دەکات و هەڕەشە لەو نوێنەرە دەستنیشانکراوانەش دەکات کە دەنگ بە جێبەجێکردنی ئەو ماددەیە دەدەن.
“ئەحمەد نادری”، جێگری کۆمیسیۆنی “ئامووزش و تەحقیقات”ی مەجلیسی ڕێژیم لە قسەکانیدا بە توندی هێرشی کردووەتە سەر زمانی نەتەوەکانی چوارچێوەی وڵاتی ئێران و بەتایبەت زمانی کوردی و بە زمانگەلێکی لاواز و بێیاسا و ڕێسای زمانەوانی و بێپێوەری زانستیی زمانی لەقەڵەم داون؛ ئەم چەواشەکارییەی ئەو نوێنەرەی ڕێژیم لە کاتێکدایە کە بەپێی ئامارەکانی یونێسکۆ بۆ ڕیزبەندی زمانە زیندووەکانی جهیان، زمانی کوردی لە سەرووتری زمانەکانی فارسی و عەرەبی و تورکییە و لە ڕیزبەندی دوو ڕەقەمی دایە، بەڵام زمانی فارسی لە ڕیزبەندی سێ ڕەقەمی ئەو ئامارانە دایە.
