ئەندامانی حیزبی دێموکراتی کوردستان لە ناوچەی “ناوتەنگ”ی مەڵەکشای سەر بە پارێزگای ئیلام، بەبۆنەی ٢٦ی سەرماوەز، ڕۆژی ئاڵا و پێشمەرگەی کوردستان، چالاکیی تەبلیغییان بەڕێوە برد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی شەممە ٢٠ی سەرماوەزی ١٤٠٠ی هەتاوی، ئەندامانی دڵسۆز و لایەنگرانی حیزبی دێموکراتی کوردستان، بەبۆنەی ٢٦ی سەرماوەز ڕۆژی پێشمەرگە و ئاڵای کوردستان لە ناوچەی “ناوتەنگ”ی مەڵەکشای سەر بە پارێزگای ئیلام بە هەڵکردنی ئاڵای پیرۆزی کوردستان یادی ٧٦ساڵەی هەڵکردنی ئاڵا و ناوی پیرۆزی پێشمەرگەیان بە چالاکی تەبلیغیی بەربڵاو، بەرز نرخاند و پەیمانی وەفاداریی خۆیان بۆ حیزبی دێموکراتی کوردستان دووپات کردەوە.
هەروەها ئەندامان و لایەنگرانی حیزبی دێموکراتی کوردستان لە شاری سەقز، سەرەڕای هەڕەشە و ترس و تۆقاندنەکانی کۆماری ئیسلامیی ئێران، بەردەوامن لە چالاکیی تەبلیغیی بەبۆنەی ٢٦ی سەرماوەز ڕۆژی پێشمەرگە و ئاڵای کوردستان.
ئەندامان و لایەنگرانی حیزبی دێموکرات لە شاری سەقز لە گەڕەکەکانی شەهرەکی دانشگا، قەرەچیاوا، بلواری دانشجوو، پردی کەوەسوار و حەماڵاوا بە بڵاوکردنەوی تراکت و پۆستێری تایبەت بە ٢٦ی سەرماوەز، یادی ٧٦ساڵەی هەڵکردنی ئاڵا و ناوی پیرۆزی پێشمەرگەیان، بەرز نرخاند.
کۆمیسیۆنی تەشکیلاتی حیزبی دێموکراتی کوردستان، وێڕای سپاس و ماندوونەبوونی لە ڕۆڵە تێکۆشەرەکانی حیزب لە ناوخۆی وڵات بەتایبەتی لە شارەکانی مەڵەکشای و سەقز، هیوای ساغی و سڵامەتی و بەردەوام‌بوونیان لە ئەرکە حیزبی و نەتەوایەتییەکاندا بۆ بە ئاوات دەخوازێ.
