ئەنجومەنی زیندانییە سیاسییەکانی ڕۆژهەڵاتی کوردستان لە پەراوێزی بەڕێوەچوونی دادگای خەڵکیی ( مانگی خەزەڵوەر) و دادگاییکردنی جەلاد حەمید نووری سێمینارێکی بۆ بەڕێز ڕەحمان سەلیمی یاساناس و ئەندامی ڕاوێژکاری کۆمیتەی ناوەندیی حیزبی دێموکراتی کوردستان بەڕێوە برد.
سەرەتای سێمینارەکە بە ساتێک ڕاوەستان بۆ ڕێزگرتن لە گیانی پاکی شەهیدانی کوردستان دەستی پێ کرد؛ پاشان سەلاح خزرپوور بەرپرسی ئەنجومەنی زیندانییە سیاسییەکانی ڕۆژهەڵاتی کوردستان باسی ئەوەی کرد کە ئاخۆ بەڕێوەچوونی ئەم دادگایانە و دەرئەنجامەکانی تا چەند کاریگەری لەسەر سیاسەتەکانی کۆماری ئیسلامیی ئێران دروست دەکەن؟
هەروەها بەڕێزیان باسی غایببوونی بزووتنەوەی سیاسیی کوردی لەو دادگایانەدا کرد و ئەوەیان بە کەمایەسییەکی گەورە زانی.
پاشان کاک ڕەحمان سەلیمی بابەتێکی تێروتەسەلی پێشکەش بە ئامادەبووان کرد. ناوبراو سەرەتا ئاماژەی بە جینایەتەکانی کۆماری ئیسلامیی ئێران کرد کە بەرامبەر بە گەلانی ئێران، لە دەرەوە و لە ناوخۆ ئەنجام دەدرێن کە تا ئێستاش هەر بەردەوامن و ئەو کەسانەی کە ئەو جینایەتانەش ئەنجام دەدەن لە کۆماری ئیسلامی دا سزانادرێن.
بەڕێزیان هەروەها ئیشارەی بە بەربەست و ئەو ڕێکارە یاساییانە کرد کە بۆ پەلکێشکردنی تاوانباران بۆ بەردەم دادگایەکی ڕاستەقینە و بێ لایەن دەبن بە کۆسپ؛ یەکەم: بەرژەوەندی وڵاتان، کە زۆرجار بە خاتری پاراستنی بەرژەوەندی وڵاتەکانی خۆیان ئەوە پیوەندی نێودەوڵەتییەکانن کە حوکم دەکەن نەک یاساکان.
دووهەم: تاوانی نێودەوڵەتی، بەو مانایە کە دادگای تاوانی نێودەوڵەتی لە تاوانی ژینۆساید ، تاوانی دژە مرۆیی ، تاوانی جەنگ لێکۆڵینەوە دەکات.
پاشان باسی لە مێژووی دادگای خەڵکیی کرد و ئیشارەی بە ئەوە کرد کە لە ساڵی ١٣٨٦ی هەتاوی هەوڵی ئەوە دراوە کە کەیسی ئێعدامکراوانی ساڵی ١٣٦٧ وەک تاوانێکی نێودەوڵەتی بناسێنن و بتوانن لەو ڕێگایەوە بەرپرسانی کۆماری ئیسلامیی ئێران ببەنە بەردەم دادگای تاوانی نێودەوڵەتی.
کاک ڕەحمان سەلیمی لە بەشێکی تری قسەکانیدا باسی جیاوازی لەنێوان دادگای خەڵکیی و ئەو دادگایانەدا کرد کە سەلاحییەتی جیهانییان هەیە. کە دادگا خەڵکییەکان زۆرتر سیاسین تا قەزایی و ئەو حوکمانەی کە لەو دادگایانە دەردەچن سەمبولێکن و جێبەجێ ناکرێن، بەڵام حوکمی ئەو دادگایانەی کە سەلاحییەتی جیهانییان هەیە جێبەجێ دەکرێن وەک دادگاییکردنی جەلاد حەمید نووری کە هەر بڕیارێک لەو دادگایە دەربچێ، جێبەجێ دەکرێت.
کاک ڕەحمان سەلیمی باسی لە گرینگی ئەو دادگایانە کرد و هەروەها خەڵک و هێزە سیاسییەکان و دیاسپۆرای ئەرکدار کرد بەرامبەر بە دێکۆمێنت کردنی ئەو جینایەتانەی کۆماری ئیسلامی کە بەرامبەر بە گەلانی ئێران ئەنجام دەدرێن، بۆ ئەوی کەڵک لەو دەرفەتانە وەرگرین.
کاک ڕەحمان سەلیمی لە کۆتایی قسەکانی دا باسی لە دادگایی حەمیدی نوری کرد کە ئەو یەکێک لە تاوانبارانی دەرەجە دووی کۆماری ئیسلامییە، کە بێ گومان ناوی دیکەیشی بەدوادا دێت کە ئەوەیش تێچووی سیاسی و دیپلۆماسی و ئابووری بۆ کۆماری ئیسلامی بەدواوە دەبێت.
شایانی باسە کە لە بڕگەی کۆتایی سێمینارەکە بەشداربووان بە سەرنج و تێپینییەکانی خۆیان بابەتەکەیان دەوڵەمەندتر کرد.
