کۆڕی فێرکاریو فەرهەنگیی ئەدەب لە شاری بۆکان بەبۆنەی هاتنەوەی نەورۆز کۆڕێکی ئەدەبیی پێکهێنا.
لەو کۆرەدا کە ڕۆژی چوارشەممە، ٤ ی خاکەلێوە بەبەشداریی دەیان کەس لە چالاکانی ئەدەبیو مەدەنیو هۆگرانی کەلەپووری کوردی بەڕێوەچوو، باس لە گرینگیی نەورۆز لە فەرهەنگو مێژووی کورددا کرا.
لەو کۆرە ئەدەبییەدا مستەفا ئیلخانیزادە، بەرپرسی کۆڕی فێرکاریو فەرهەنگیی ئەدەب لە شاری بۆکانو؛ حوسێن شێربەگی، نووسەرو وەرگێڕ لە سەر پێگەی نەورۆز لە ئەدەبییات، مێژوو و فەرهەنگی کوردداو گرینگیی پاراستنی ئەو بۆنەیەو بایەخپێدانی قسەیان کرد.
لە بڕگە سەرەکییەکەی کۆرەکەشدا سەعید نەججاڕی ( مامۆستا ئاسۆ)، حوسێن گوڵۆڵانی، سەلاح ساڵحی، عومەر محەمەدی، ئامینە چاک، عەلی حەقیقی، ئاڵا نیساری، ڕۆژین قوربانی، ھادی قەدیمی، ھێمن سۆھرابی، ڕەسووڵ چووپانی(شوانە)، ئەنوەر محەممەدڕەحیمی، داوود نشێو، سەردار پاکزادو سەیدزادە قاقان قادری شێعرو پەخشانە ئەدەبییەکانی خۆیان بەو بۆنەیە خوێندەوە.
لە بڕگەیەکی دیکەی کۆڕەکەدا چەند مەقام و ئاواز بە دەنگی ھیوا و ماردین خادم، حەیران و گۆرانی بەدەنگی لوقمان عەزیزی و ڕەحیم مام محەممەدی بە شمشاڵی خالید عینایەتی و دەفی سەیوان فەقێ کەریمی پێشکێش کران.