بە ئامادە بوونی کۆمەڵێک لە كەسایەتییە فەرهەنگی، هونەریو ئەدەبییەكانو بەشێک لە كاربەدەستانو خەڵكی شاری مەهابادو دەوروبەر، پێشانگای هەوارگەی فەرهەنگو نەریتە كوردییەكان” لە مەهاباد كرایەوە.
ئەم پێشانگایە كە لە ڕۆژی یەكشەممە ١ی خاكەلێوەی ساڵی ٩٥ دەستی بە كار كردوە، تا ڕۆژی پێنجشەممە ١٢ی خاكەلێوە بەردەوام دەبێ.
ئەم پێشانگایە بە پێشاندانی شانۆی فۆلكلۆری “كۆسە بە داس” دەستی بە كارەكانی كرد، پاشان پۆڵا ئاغاز، بەرپرسی بەڕێوەبەری پێشانگاكە، سەید ڕەسووڵ نەبەوی، ئەندامی شوورای شارو؛ عەزیز وەلیانی، نووسە و لێكۆڵەر لە بابەت گرینگیی بایەخدان بە فەرهەنگو فولكلۆرو هەروەها پێگەی نەورۆز لە فەرهەنگی كوردیدا قسەیان كرد.
خوێندنەوەی شێعرێك لە لایەن ئیسماعیل شاهۆییو ژەنینی شمشاڵ لە لایەن بەهمەن مەولوودی، ژەنینی ویۆڵۆنو تونبەك لە لایەن هونەرمەندان ئارەش ندا و زاهیر ئولفەتە و چەند تابڵۆی هەڵپەڕكێ لە لایەن گرووپی هەڵپەڕكێی لاوانی مەهاباد چەند بەشی دیكەی ئەم ڕێوڕەسمە بوون.
دووهەمین ڕۆژی ئەم پێشانگاکەش بە كێبڕكێی كەروێشك و بەبەشداریی کۆمەڵێک لە منداڵان درێژەی پێدراو مەبەست لە بەڕێوەبردنی ئەم بەشەش، ئاشنا كردنی منداڵان و مێرمنداڵان بە پارێزگاری كردن لە گیانەوەرانو بایخدان بە ژینگە بوو. لە دووهەمین ڕۆژی پێشانگادا هەروەها ڕێز لە خاتوو مریەم قازی، نووسەرو چیرۆكنووسی شاری مەهاباد گیرا و كۆمەڵێك لە شاعیرانی خەڵكی ئەم شارەش وەك مامۆستا سووتاو و محەممەد فەهیمی چەند پارچە شێعرێكیان پێشكەش كرد. لە درێژەی كاروباری پێشانگاكەدا گرووپی هەڵپەڕكێی هەوارگە بە چەند تابڵۆیەكی هەڵپەڕكێ ڕێوڕەسمەكەیان ڕازاوەتر كرد.
شایانی باسە لەم پێشانگایەدا چەند ژوور بۆ چێشتی جۆراوجۆر، جل و بەرگ، گیا دەرمانییەكان، ئامێرەكانی مووسیقی، كەلوپەلی كشتوكاڵو ژینگەپارێزی، كەرستەی پێویستی ژیانو دابو ڕەسمی كوردەواریو هەروەها چەندین كتێبیش كە بە زمانی كوردی نووسرابوون تەرخان كرابوو كە سەردانكاران لە نزیكەوە چاویان پێیان كەوت.
