ئەندامانی حیزبی دێموکراتی کوردستان لە ناوچەی بۆکان، بە بۆنەی ٢٦ی سەرماوەز ڕۆژی ئاڵا و پێشمەرگەی کوردستان، چالاکیی تەبلیغیان بەڕێوە برد و بەرەو پیری ئەو ڕۆژە چوون و ڕۆژی ئاڵا و پێشمەرگەیان پیرۆز نرخاند.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی چوارشەممە ١٠ی سەرماوەزی ١٤٠٠ی هەتاوی، ئەندامانی دڵسۆز و لایەنگرانی حیزبی دێموکراتی کوردستان، بە بۆنەی ٢٦ی سەرماوەز ڕۆژی پێشمەرگە و ئاڵای کوردستان لە ناوچەی بۆکان بە بڵاو کردنەوەی وێنەی پێشمەرگە و ئاڵای پیرۆزی کوردستان یادی ٧٦ساڵەی هەڵکردنی ئاڵا و ناوی پیرۆز پێشمەرگەیان بە چالاکی تەبلیغی بەربڵاو بەرز و پیرۆز نرخاند.
ئەندامان و لایەنگرانی حیزبی دێموکراتی کوردستان، سەرەڕای هەڕەشە و ترس و تۆقاندنەکانی کۆماری ئیسلامیی ئێران، بەردەوام بۆنە و ڕێوڕەسمە نەتەوەییەکانی خۆیان هەمیشە بەرز و پیرۆز ڕادەگرن و لە هەموو دۆخێکدا بابەتی نەتەوەیی لەسەروو هەموو شتێکەوەیە.
هێزە سەرکوتکەرەکانی کۆماری ئیسلامی بەردەوام هەوڵی تواندنەوەی ناسنامەی نەتەوەیی کورد دەدا بەلام ڕۆڵە ئازا و دلێرەکانی ڕێبازی حیزبی دێموکرات قەت کۆڵیان بۆ هەڕەشەکانی ڕێژیم نەداوە و بە بۆنەی یادی ٧٦ ساڵەی نێودێرکردنی ناوی پێشمەرگە و ئاڵای پیرۆزی کوردستان، چالاکی تەبلیغییان بەڕێوە برد.
