خۆكوشتنی ژنێك لە سەرپۆلی زەهاو بە تفەنگی ڕاو

ژنێكی ٣٥ ساڵەی خەڵكی شاری سەرپۆلی زەهاو بە تفەنگی ڕاو لە خۆی داوەو خۆی كوشتووە.
بەپێی ڕاپۆرتی هەواڵدەریی كوردستان‌و كورد ئەم ژنە لەنێو ماڵی خۆی لە یەكێك لە گەڕەكەكانی شاری سەرپۆلی زەهاو بە كەلكوەرگرتن لە تفەنگێكی ڕاو كۆتایی بە ژیانی خۆی هێناوە.
به‌پێی ئه‌و ڕاپۆرته‌ سەرەڕای گواستنەوەی تەرمی ئەم ژنە بۆ پزیشكی قانوونی و لێكۆڵینەوەو بەدواداچوونە قەزاییەكان بەڵام تا ئێستاش هۆكاری خۆكوشتنی ئەم ژنە لە لایەن بنەماڵەكەی‌و كاربەدەستانی پۆلیسەوە ڕانەگەیەندراوە.
خۆكوژیی ئەم ژنە لە سەرپۆلی زەهاو لە حاڵێك دایە كە ڕۆژی سێشەممە ٢٥ی ڕەشەممەش لە شاری مەهابادیش تارا عەزیزپوور بە تەناف خۆی هەڵواسیبوو و كۆتایی بە ژیانی خۆی هێنابوو.
كارناسانی كۆمەلایەتیی دەڵێن هەڵاواردنی ڕەگەزی، نەبوونی هیوا بە داهاتوو، بارودۆخی ئابووریی كۆمەڵگا، بڵاوبوونەوەی مادەی سڕكەر و پەرەسەندانی دیاردەی ئیعتیاد، تاوان و خەسارە كۆمەڵایەتییەكان‌و بێكاری و هەست بە تەنیایی كردن چەند هۆكارێكن بۆ خۆكوژی، بەڵام سەرەكیترین هۆكارەكانی پەنا بەردنە بەر خۆكوژی قانوونە پیاوسالارانەكانی كۆماری ئیسلامی‌و دواكەوتوویی و باو بوونی سوننەتە خراپەكان لە بابەت دەسەڵاتی بێ حەد و سنووری پیاو و قووڵبوونەوەی پیاوسالاری لەم وڵاتەیە.