خاتوو “فەرەح سالیکی”، ژنێکی نیشتمانپەروەر و هاوسەری شەهید “جەعفەر عومەربیل” و خوشکی شەهید “حوسێن باپیری” بەهۆی نەخۆشیی شێرپەنجەوە لە شاری پیرانشار بۆ هەمیشە ماڵاوایی لە ژیان کرد.
بەپێی هەواڵی گەیشتوو بە ناوندی ڕاگەیاندنی حیزبی دێموکراتی کوردستان، ڕۆژی شەممە ٢٩ی خەزەڵوەری ١٤٠٠ی هەتاوی، خاتوو فەرەح سالیکی، هاوسەری شەهید جەعفەر عومەربیل و خوشکی شەهید حوسێن باپیری ماڵاوایی لە ژیان کرد.
خاتوو فەرەح ژنێکی نیشتمانپەروەر و دڵسۆزی نەتەوەکەی بوو و تا کاتی کۆچی‌دوایی هەمیشە دڵی بۆ ئازادیی نیشتمان لێدەدا و وەفادار بوو بە ڕێبازی پیرۆزی شەهیدان کورد و کورستان؛ هەروەها بنەماڵەی ناوبراو بنەماڵەیەکی خۆشناو و خاوەن کەسایەتی لە ناوچەی مەهاباد بوون.
خاتوو فەرەح دوای شەهیدبوونی هاوسەرەکەی بۆ دابینکردنی بژێوی ژیان ڕووی کردە شاری پیرانشار و هەر لەو شارە بەهۆی نەخۆشیی شێرپەنجەوە ماڵاوایی لە ئامانجی پیرۆزی شەهیدانی کوردستان کرد و دڵە پڕ لە ئاواتەکەی لە لێدان کەوت.
شەهیدان جەعفەر عومەربیل و حوسێن باپیری، شەهیدانی ڕێبازی حیزبی دێموکرات لەسەر بەرگری لە مافی ڕەوای نەتەوەکەی خۆیان گیانیان بە خاکی پیرۆزی نیشتمان بەخشی و لە پێناو ئازادی و سەربەستیی نیشتمان وەکوو هەموو شۆڕشگێڕانی مەیدانی خەبات لە بەرانبەر داگیرکارییەکانی کۆماری ئیسلامیی ئێراندا، قارەمانانە بەرگرییان کرد تا ئەو ساتەی کە پەیوەست بە کاروانی نەمرانی کوردستان بوون.
لەلایەن ناوەندی ڕاگەیاندنی حیزبی دێموکراتی کوردستانەوە، پرسە و سەرەخۆشی خۆمان ئاراستەی بنەماڵەکانی عومەر بیل و سالیکی و هەموو خەڵکی ناوچەی مەهاباد و پیرانشار دەکەین و خۆمان بە شەریکی خەمیان دەزانین.
