هادی عامری، سەرەڕای هەڕەشەی بایکۆتی کاروباری سیاسیی لە عێراق، نوێنەرایەتیی نەتەوە یەکگرتووەکان لە بەغدا بە دەستێوەردان لە هەڵبژاردنی پارلمانی عێراق تۆمەتبار دەکات.
هادی عامری، فەرماندەی سپای بەدر و بەرپرسی هاوپەیمانیی فەتح، ڕۆژی چوارشەممە ١٩ی خەزەڵوەری ١٤٠٠ی هەتاوی لە بەیاننامەیەکدا پاش شکستی هاوپەیمانییەکەی لە هەڵبژاردنەکانی عێراق، ناڕەزایەتیی لەهەمبەر ئاکامی هەڵبژاردنەکان دەربڕی و داوای پێداچوونەوە بە ئاکامی هەڵبژاردنەکان دەکا و دەڵێ: هاوپەیمانی فەتح بە تەواوەتی کاروباری سیاسیی لە عێراق بایکۆت دەکات.
هەرلەم پێوەندییەدا لە بەیاننامەکەی فراکسیۆنی” فەتح”دا هاتووە کە نوێنەری رێکخراوی نەتەوە یەکگرتووەکان، کۆمیسیۆنی باڵای هەڵبژاردنەکانی عێراقی بردۆتە ژێر دەسەڵاتی خۆی و دەور و نەخشێکی نەرێنییان لە هەڵبژاردنەکانی عێراقدا گێڕاوە و ئێمە وەکوو فراکسیۆنی فەتح ئاکامی هەڵبژاردنەکانمان قەبووڵ نییە.
جێگەی ئاماژەیە کە هادی عامری و قەیس خەزعەلی لە فەرماندەکانی سپای بەدر و عەسائێبی ئەهلی حەق کە سەر بە رێژیمی ئێرانن لە چەندین کۆبوونەوەی ناڕەزایەتیی لە بەغدا کە بەمەبەستی ناڕەزایەتیی دەربڕین بە ئاکامی هەڵبژاردنەکان بەڕێوەچووبوون بەشێوەیەکی ئاشکرا هەڕەشەیان لە مستەفا کازمیی، سەرۆک وەزیرانی عێراق و ئەندامانی دەوڵەتەکەی کردووە.
