سەرەڕای تێپەڕینی نزیكەی مانگێك بەسەر دەستبەسەركرانی ٧ كەس لە چالاكانی مەدەنیو فەرهەنگیی كورد لە شاری سەقز، بەڵام تا ئێستاش هیچ زانیارییەك لە بابەت چارەنووسی ئەم كەسانە لەبەر دەستدا نییە.
فاتح دونداری، فەرشاد دارایی، نادر مەجیدیان، بێهرووز ڕیشەساحیب، وەفا فیرووزە، دلێر شەمسی و سامان ڕەببانی ئەم ٧ چالاكە مەدەنیو كۆمەڵایەتییەن كە لە ڕۆژی ٢٥ی ڕێبەندان، وێڕای ١٠ كەسی دیكە، لە میوانییەكدا لە ماڵی نادر مەجیدیان لە شەقامی بەناو شوهەدای سەقز دەستبەسەر كران. لە درێژەی ئەم زنجیرە دەستبەسەر كرانانەدا ڕۆژی شەممە ١٥ی ڕەشەممە كەسێكی دیكەش بە ناوی ڕەزا مەجیدیان دەستبەسەر كرا.
بەپێی ڕاپۆرتی كانوونی پارێزەرانی مافەكانی مرۆڤی كوردستان تا ئێستاشی لەگەڵ بێ ئەم كەسانە هەروا دەستبەسەرن. بنەماڵەی ئەم گیراوانەش دەڵێن، تا ئێستا ئیدارەی ئیتلاعاتی سەقز هیچ زانیارییەكی ڕوونو ئاشكرای لە پێوەندی لەگەڵ هۆكاری دەستبەسەركرانو چارەنووسی ڕۆڵەكانیان پێ نەداون. ههروهها تا كاتی ئامادە كرانی ئەم هەواڵە ئەم گیراوانە نەیانتوانیوە بە هیچ شێوەیەك پێوەندی بە بنەماڵەكانیانەوە بگرنو ڕێگەشیان پێ نەداون كە چاویان پێیان بكەوێ، لە لایەكی دیكەشەوە نە هیچ زانیارییەكیان لە بابەت شوێنی ڕاگرتنیان پێ دەدرێو نە پێیان دەڵێن هۆكاری دەستبەسەر كرانیان چی بووە.
