كوژران‌و برینداربوونی ٢٥ كۆڵبەری کورد به‌ ته‌قه‌ی هێزه‌ چەكدارەكانی كۆماری ئیسلامی

لە سەرەتای ئەمساڵەوە تا ئێستا ٢٥ كۆڵبەر‌و كاسبكار لە ناوچە سنوورییەكانی كوردستان بە تەقەی ڕاستەوخۆی هێزە چەكدارەكانی ڕێژیم كوژراون یان بریندار بوون.
مادح پەرتەوی نوێترین قوربانیی سیاسەتی هەڵاواردنی كۆماری ئیسلامی له‌ کوردستان‌و كوشتوبڕی كۆڵبەرانی كوردە كە ڕۆژی یەكشەممەی حەوتووی ڕابردو، ١٦ی ڕەشەممە لە ناوچە سنوورییەكانی مەریوان كەوتە بەر دەستڕێژی هێزەكانی ڕێژیم‌و گیانی لە دەستدا.
شوورای هاوئاهەنگیی ڕێفۆرمخوازانی مەریوان‌و سەوڵاوا بۆ كاردانەوە لە بابەت بەردەوامیی كوشتنی كۆڵبەران بە بڵاوکردنه‌وه‌ی بەیاننامەیەك داوای پێڕاگەیشتن به‌م بابه‌ته‌ی له‌ كاربەدەستانی پێوەندیدار کردوه‌.
ئەم شوورایە داوای لە كاربەدەستانی پلەبەرزی پارێزگای سنەو شاری مەریوان كردوە که‌ وێڕای لێپرسینه‌وه‌ له‌ بكووژانی مادح پەرتەوی، لە پێناو پەرەپێدانی ژێرخانە ئابووری‌و سەنعەتییەكانی پارێزگای سنە و بە تایبەت شاری مەریوان تێ‌بکۆشن‌و هەنگاوی پێویستیش لە بابەت دابینكردنی ئەمنیەتی شوغڵی و ئابووریی خەڵكی ئەم ناوچەیە هەڵێننەوە.
بەپێی ڕاپۆرتی سەرچاوەكانی هەواڵ ژماره‌ی ئەم كۆڵبەرانەی كە لە سەرەتای ئەمساڵەوە به‌ ته‌قه‌ی هێزە چه‌کداره‌کانی رێژیم كوژراون‌و بریندار بوون ٢٥ كەسن كە ١٣ که‌سیان كوژراون‌و ١٢ که‌سیان بریندار بوون.
شایانی که‌ زۆربەی ئەم كۆڵبەرانە لە كەسانی فەقیر‌و هەژار پێك هاتوون كە تەنیا بۆ دابینكردنی بژێوی ژیانی خۆیان‌و بنەماڵەكانیان ڕوویان لەم كارە پڕمەترسییە كردوە‌و لە حاڵێكدا كە گیانیان لەسەر بەری دەستیان داناوە، بۆ پەیداكردنی پارووە نانێك ڕوو لە سنوورەكانی كوردستان دەكەن.