دژبەرانی سیاسیی دەوڵەتی تورکیە دەڵین: ئەردۆغان سیاسەتی دەرەوە، وەکوو ئامرازێک بۆ شاردنەوە و پاساوهێنانەوەی ناکارامەییەکانی لە سیاسەتی نێوخۆیی بەکاردێنێ.
کەماڵ قلیچدار ئۆغڵوو، ڕێبەری “پارتی کۆماری گەل” (CHP)، یەکێک لە حیزبە ئۆپۆزیسیۆنەکانی تورکیە، ڕۆژی یەکشەممە ٢ی خەزەڵوەری ١٤٠٠ی هەتاوی، لە وتووێژیکدا لەگەڵ ڕۆژنامەی”زەمان”ی تورکیە، بە ئاماژە بەوەیکە لە هەڵبژاردنەکانی داهاتوودا حیزبەکەی سەرکەوتوو دەبێ، وتی: ئەردۆغان لە داهاتوویەکی نزیکدا لە دەسەڵات دوور دەکەوێتەوە و دارودەستەکەی و نادادپەروەرییەکان و تەنانەت گرانی و ماڵوێرانیش لە تورکیە لەگەڵ خۆی دەبات.
هەڕەشەکانی ڕۆژی شەممەی ڕەجەب تەیب ئەردۆغان سەرۆک‌کۆماری تورکیە، سەبارەت بە دەرکردنی ١٠ باڵوێزی وڵاتانی بیانی بە تایبەتی ئەمریکا کە داوای ئازادکردنی عوسمان کاوالا، چالاکی مەدەنیی بەندکراویان کردبوو، ڕووبەڕووی ڕەخنەی زۆری نێونەتەوەیی و نێوخۆیی بووەتەوە.
حیزبە سیاسییەکانی دژبەری ئەردۆغان بە تایبەتی رێبەری “پارتی کۆماری گەل” داوایان لە ئەردۆغان کردووە کە بە جێگەی دەرکردنی باڵوێزانی وڵاتانی ئورووپایی، کێشە و گرفتەکانی تورکیە بە تایبەتی قەیرانی ئابووریی و دابەزینی بەهای لیرەی تورکی چارەسەر بکا.
کەماڵ قلیچدار ئۆغڵوو دەڵێ: ئەردۆغان بە دەرکردنی بڕیاری دەرکردنی باڵوێزی ١٠ وڵاتی ئورووپایی و ئەمریکا، وڵاتی تورکیە بەرەو هەڵدێر و ڕووخان دەبا و ئامانجی سەرەکیی ئەردۆغان بەرگریی و پاراستنی بەرژەوەندییە نەتەوەییەکانی تورکیە نییە، بەڵکوو تەنیا ئابووری تورکیە وێران دەکا.
هەر لەم پێوەندییەدا ئەحمەد داوود ئۆغڵوو، ڕێبەری حیزبی “ئایندە” و سەرۆک‌وەزیرانی پێشووی تورکیە بە رەخنەگرتنی توند لە بڕیارەکانی ئەردۆغان وتی: ئەو بڕیارەی ئەردۆغان سەبارەت بەدەرکردنی ١٠ باڵوێزی بیانی لە تورکیە، سەربەخۆیی دەزگای قەزایی تورکیە دەباتە ژێر پرسیار.
