حەوتوویەک دوای تەواوبوونی هەڵبژاردنەكانی عێراق، میلیشیا و لایەنەكانی سەر بە ڕێژیمی ئێران لە عێراق، ئاكامی هەڵبژاردنەكانیان ڕەتكردووەتەوە ودەستیان كردووە بە ئاژاوەنانەوە لەو وڵاتە.
بەپێی هەواڵدەرییەكانی عێراق ڕۆژی یەكشەممە ٢٥ی ڕەزبەر، لایەنگرانی بەشێک لە گرووپە میلیشیاییەکانی سەر بە ئێران، لە هەندێك لە بەشەكانی شاری بەغدای پێتەختی عێراق دەستیان كردووە بە ناڕەزایەتی دەربڕین و ئاژاوە نانەوە و لەگەڵ هێزە ئەمنییەكانی عێراق ڕووبەڕووو بوونەتەوە و بەشێل لە ڕێگا سەرەكییەكانی ئەو شارەیان بەستووە و هەروەها لە شاری بەسرەی عێراقیش هێندێک میلیشیای سەر بە ڕێژیمی ئێران كێشەیان بۆ خەڵكی ئەو شارە سازكردووە.
هەر لەم پێوەندییەدا ڕێكخراوی هاواهەنگی بەرخۆدانی عێراق كە پێكهاتووە لە لایەنە توندئاژۆكانی سەر بە ڕێژیمی ئێران، ئاكامی هەڵبژاردنەكانیان ڕەتكردووەتەوە و سكاڵایەكیان بۆ دەزگای دادوەریی باڵای عێراق ناردووە و داوای بەدواداچوونیان بۆ ئاكامەكانی هەڵبژاردن كردووە و پێشتریش شۆرای هەڵبژاردنیان بەوە تاوانبار كردووە كە بێ‌لایەن نەبووە و شایانی بەرپرسایەتی و چاوەدێری بە سەر هەڵبژاردنەكاندا نەبووە.
جێی ئاماژەیە کە پاش ئەو هەموو تێچوو و پڕۆپاگەندایەی ڕێژیمی ئێران لە عێراقدا، ئەم ئاكامە بە دوور لە چاوەڕوانی ڕێژیمی ئێران و لایەنگرەكانی لە عێراقدا بوو و وەكوو شكستێكی گەورە بۆ ئەو ڕێژیمە بوو و خەڵكی عێراق پیشانیان دا كە بە هیچ شێوەیەک ڕازی بە دەستێوەردانەكانی ڕێژیمی ئێران لە عێراقدا نین.
