كۆڕی ڕاوێژكاریی چالاكانی مەدەنیی یارسان لە بەیاننامەیەكدا ڕایگەیاند كە بەهۆی پێنەدانی مۆڵەت، خۆپێشاندانەکەی خۆیان دوا خستوە.
سیاوەش حەیاتی، وتەبێژی ئەم كۆڕە وێڕای پشتڕاستكردنەوەی ئەم هەواڵە گوتی یارسانییەكان بەهۆی پێ نەدانی مۆڵەتو بە لەبەرچاوگرتنی بارودۆخی تایبەتی ئەم پارێزگایە خۆپێشاندانەكەی خۆیان دوا خستووە، بەڵام هەروا خوازیاری وەڕێخستنو پێكهێنانی کۆڕو کۆبوونەوە بۆ مەحکومکردنی پێشێلكردنی مافی یارسانییەکانو هەموو مرۆڤەكانن.
سیاوەش حەیاتی بنەمای ئەم گرفتانەی بۆ سیاسەتی هەڵاواردن گەڕاندۆتەوەو دەڵێ لە ماوەی چەندین ساڵو چەند دەیەی ڕابردوودا هیچ كەس لە ئێران لەسەر سووكایەتی كردن بە بیرو بڕوا و پیرۆزییەكانی یارسانییان سزا نەدراوەو لەسەر تریبوونە ڕەسمییەكانیش باس لەم مەسەلە نەكراوە، بۆیە کۆمەڵێک بێ ترس لە پرسینەوە درێژە بە سوکایەتییەکانیان دەدەن.
شەپۆلی نوێی سووکایەتی بە هاوزمانانی یارسانی، دوای ئەوە دەستی پێکرد کە ناوهنده ئهمنیهتییهکانی ڕێژیم بە ئاشکرا پشتیوانییان لە بەربژێرێکی دەستنیشانکراوی خۆیان لە حەوزەی هەڵبژاردنی شائابادو داڵاهۆ کردو بۆ جاری سێهەم وەک نوێنەری ئەم حەوزەیە – کە زۆربەی دانیشتوانی یارسانین- ڕێگای چوون بۆ مەجلیسیان بۆ کردەوە.
پێویست بە گوتنە كە لە مانگی جۆزەردان تا گەلاوێژی ساڵی ٩٢ سێ كەس لە ڕێڕەوانی ئایینی یارسان بە ناوەكانی حەسەن ڕەزەوی، نیكمەرد تاهیری و محەممەد قەنبەری بە هۆی هەڵاواردن و بێڕێزی پێكردن دژی ئەم كەمینەیە بۆ ناڕەزایەتی دەربڕین خۆیان سووتاند، ئەم كارە پاش ئەمە ڕووی دا كە سمێڵی بەندكراوێكی یارسان بە ناوی كیومێرس لە زیندانی هەمەدان بە زۆری تاشی، بەم كردەوەیە بێڕێی بە پیرۆزییەكانی ئایینی یارسان كرا.
ئەهلی حەق یان یارسان، ئایینێكە كە حەشیمەتیان لە ئێراندا زیاتر لە ٢ میلیۆن كەسەو زۆربەیان لە ڕۆژهەڵاتی كوردستانو باكووری ڕۆژئاوای ئێران دەژین.